Rahul Gandhi News: 'स्वातंत्र्यवीर’ ही उपाधी सावरकरांनाच का? राहुल गांधींच्या वकिलांचा न्यायालयात थेट सवाल!

Pune News: "अंदमानच्या कारागृहात विनायक सावरकर यांच्या बरोबर जवळपास 568 इतर क्रांतिवीरांनी काळ्या पाण्याची शिक्षा भोगली, हालअपेष्टा सहन केल्या. त्यामध्ये अनेकांनी प्राणही गमावले. मात्र हे सर्व क्रांतिकारक माझ्यासाठी समान असून त्यांच्या त्यागाबद्दल मला अपार आदर आहे," अशी भूमिका स्वातंत्र्यवीर सावरकर यांचे नातू सात्यकी सावरकर यांनी न्यायालयात मांडली.

विनायक दामोदर सावरकर यांच्या संदर्भात केलेल्या कथित वादग्रस्त वक्तव्यामुळे राहुल गांधी यांच्याविरोधात दाखल केलेल्या मानहानीच्या खटल्याची सुनावणी सध्या पुणे जिल्हा व सत्र न्यायालयात सुरू आहे. या दरम्यान सात्यकी सावरकर यांची उलटतपासणी सुरु आहे.

बचाव पक्षाचे म्हणजेच राहुल गांधी यांचे वकील ,ॲड. मिलिंद पवार यांनी, “अंदमानमध्ये शिक्षा भोगताना मृत्यू झालेल्या सर्व क्रांतिकारकांना ‘स्वातंत्र्यवीर’ म्हणता येईल का?” असा थेट प्रश्न उपस्थित केला. यावर उत्तर देताना सात्यकी सावरकर म्हणाले, "सशस्त्र आणि निशस्त्र अशा दोन्ही प्रकारचे क्रांतिकारक होते, मात्र उपाधी या जनतेकडून दिल्या जातात.महात्मा गांधी यांना ‘महात्मा’ ही उपाधी जनतेने दिली, पण प्रत्येक स्वातंत्र्यसैनिकाला ‘महात्मा’ म्हटले जात नाही. त्याचप्रमाणे आझाद हिंद सेनेतील सर्व सैनिकांना ‘नेताजी’ म्हटले जात नाही. ‘स्वातंत्र्यवीर’ ही उपाधी देखील जनतेने सावरकरांना दिली असून, त्यामुळे इतर क्रांतिकारकांचे योगदान कमी होत नाही, असे त्यांनी स्पष्ट केले.

“इतर क्रांतिकारकांना ‘स्वातंत्र्यवीर’ न म्हणणे हे समानतेच्या विरोधात आहे का?” या उपप्रश्नावर त्यांनी, “माझ्या दृष्टीने सर्वच क्रांतिकारक समान आहेत,” असे सांगत कोणालाही महात्मा, स्वातंत्र्यवीर, लोकमान्य किंवा क्रांतिवीर म्हणण्यास माझा आक्षेप नसल्याचे त्यांनी नमूद केले. या प्रकरणात पुढील सुनावणी 29 एप्रिल रोजी होणार आहे. न्यायालयातील या घडामोडींमुळे राजकीय वर्तुळात चर्चांना उधाण आले आहे.