Raj Thackeray News : घुमजाव करण्याचा डाव तर नाही ना? राज ठाकरेंचे फडणवीस सरकारमधील मंत्र्यांना खरमरीत पत्र...

Controversy Over Hindi in Maharashtra : मनसे अध्यक्ष राज ठाकरे यांनी पुन्हा एकदा हिंदी भाषेचा मुद्दा ऐरणीवर आणला आहे. मनसेच्या विरोधानंतर सरकारने तिसऱ्या भाषेसाठी हिंदी भाषेची सक्ती केली जाणार नाही, असं घोषित केलं. पण अद्यापही त्याबाबत लेखी आदेश काढण्यात आलेला नाही, असे म्हणत राज यांनी सरकारचा घुमजाव करण्याचा डाव तर नाही ना, असा सवालही केला आहे.

राज ठाकरेंनी बुधवारी शालेय शिक्षणंत्री दादाजी भुसे यांनी खरमरीत पत्र लिहिलं आहे. या पत्रात त्यांनी म्हटले आहे की, गेले जवळपास २ महिने महाराष्ट्रात पहिली इयत्तेपासून हिंदी भाषा शिकवणे यावरून सरकारकडून प्रचंड गोंधळ घालणं सुरु आहे.

सुरुवातीला पहिल्या इयत्तेपासून तीन भाषा विद्यार्थ्यांना शिकवणार आणि त्यात हिंदी भाषा ही तिसरी सक्तीची भाषा असेल असं घोषित केलं गेलं. त्याविरोधात जनभावना इतकी तीव्र होती की सरकारने तिसऱ्या भाषेसाठी हिंदी भाषेची सक्ती केली जाणार नाही असं घोषित केलं. या घोषणेचा लेखी अध्यादेश अजून का आला नाही?, असा सवालही ठाकरेंनी भुसेंना केला आहे.

माझ्या महाराष्ट्र सैनिकांची माहिती आहे की, आधीच्या तीन भाषा शिकवणे आणि त्यात हिंदीचा समावेश असणे या निर्णयाचा आधार घेऊन, हिंदी भाषेच्या पुस्तक छपाईला केव्हाच सुरु झाली आहे. आता पुस्तकं छापली आहेत मग पुन्हा आपल्याच निर्णयावर घुमजाव करायचं असं काही करण्याचा सरकारचा काही डाव तर नाही ना?, अशी शंका राज ठाकरेंनी पत्रातून उपस्थित केली आहे.  

असं काही नसेल असं मी गृहीत धरतो, पण असं काही झालं तर महाराष्ट्र नवनिर्माण सेना जे आंदोलन उभं करेल त्याला सरकार जबाबदार असेल, असा इशारा ठाकरेंनी दिला आहे. इतर राज्यांसारखी तीव्र अस्मिता सरकार पण दाखवेल अशी अपेक्षा. त्यामुळे शिक्षण विभागाने इयत्ता पहिलीपासून दोनच भाषा शिकवल्या जातील (मराठी आणि इंग्रजी) या निर्णयाचा लेखी आदेश लवकरात लवकर जारी करावा, अशी मागणी राज ठाकरेंनी केली आहे.