Ramdas Athawale : अखेर रामदास आठवलेंना राज्यसभेची उमेदवारी जाहीर, चर्चांना पूर्णविराम

ाजपज Maharashtra political news : राज्यसभा निवडणुकीची घोषणा झाल्यापासून केंद्रीय राज्यमंत्री रामदास आठवले यांची उमेदवारी फिक्स मानली जात होती. मात्र, मागील काही तासांत घडलेल्या घडामोडींमुळे भाजप आठवलेंना धक्का देणार का, अशी चर्चा सुरू झाली होती. मात्र, भाजपने या चर्चांना पूर्णविराम देत आठवलेंना उमेदवारी जाहीर केली आहे.

पंतप्रधान नरेंद्र मोदी यांच्या मंत्रिमंडळात आठवले यांचे स्थान आतापर्यंत कायम राहिले आहे. आतापर्यंत भाजपच्या कोट्यातून ते दोनदा राज्यसभेवर निवडून गेले आहेत. आता तिसऱ्यांदाही त्यांना संधी मिळू शकते, अशी चर्चा होती. आठवले यांनी संसदेच्या एका अधिवेशनात राज्यसभेत केंद्रीय मंत्री जे. पी. नड्डा यांच्यासमोर याबाबत विधान केले होते. त्यावेळी नड्डा हे भाजपचे राष्ट्रीय अध्यक्ष होते.

राष्ट्रीय अध्यक्ष नितीन नबीन आहे. आठवले यांनी त्यांची नुकतीच भेट घेतली होती. या भेटीमध्ये राज्यसभेबाबत चर्चा झाल्याचे मानले जाते. काही दिवसांपूर्वीच आठवले यांनी आपण राज्यसभेवर सहज निवडून येऊ शकतो, पण आपल्याला लोकसभा निवडणूक लढवायची असल्याचे विधान केले होते. या विधानानंतर राजकीय चर्चांना उधाण आले होते.

अखेर भाजपने आज आठवले यांना उमेदवारी जाहीर केली आहे. त्यामुळे आठवले सलग तिसऱ्यांदा भाजपच्या कोट्यातून राज्यसभेवर जाणार असल्याचे निश्चित झाले आहे. त्यामुळे त्यांच्याकडे केंद्रीय राज्यमंत्रिपदही कायम राहणार आहे.

दरम्यान, आठवले यांनी मंगळवारी फडणवीसांची भेट घेतली होती. या भेटीबाबत खुद्द आठवलेंनीच माहिती दिली. सोशल मीडियात केलेल्या पोस्टमध्ये त्यांनी म्हटले आहे की, मुख्यमंत्री देवेंद्र फडणवीस यांच्याशी भेट घेऊन येऊ घातलेल्या राज्यसभा निवडणुकीच्या पार्श्वभूमीवर सविस्तर चर्चा झाली. सध्याच्या राजकीय परिस्थितीचा आढावा घेत पुढील रणनीती, समन्वय आणि व्यापक राजकीय घडामोडींवर विचारविनिमय करण्यात आला.

दरम्यान, राज्यात सात जागेंसाठी राज्यसभेची निवडणूक होणार आहे. त्यापैकी चार जागा भाजपला, प्रत्येक एक जागा शिवसेना, राष्ट्रवादी काँग्रेस व महाविकास आघाडीला मिळू शकते. अद्याप महाविकास आघाडी आणि शिवसेनेचे उमेदवार निश्चित झालेले नाहीत.