Maharashtra Politics : 'सुनील तटकरे कमळाच्या वाटेवर, लवकरच भाजप प्रवेश...', शिंदेंच्या शिलेदाराच्या वक्तव्याने खळबळ

Raigad Politics : रायगडच्या राजकारणात खासदार सुनील तटकरे विरुद्ध एकनाथ शिंदेंची शिवसेना असे चित्र आहे. तटकरे हे राष्ट्रवादी काँग्रेसचे प्रदेशाध्यक्ष देखील आहेत. मात्र, ते लवकरच भाजपमध्ये जाणार असल्याचा धक्कादायक दावा शिंदेंचे आमदार महेंद्र दळवी यांनी केला आहे.

दळवी म्हणाले, 'तटकरे हे कुणाशी एकनिष्ठ नाहीत. ज्यांच्या हाताखाली त्यांनी काम केलं त्यालाच त्यांनी फसवलं. त्यांच आयुष्य चिटींगमध्ये गेलंय. आता त्यांची कमळाच्या दिशेने वाटचाल सुरू असून लवकरच ते भाजपमध्ये जातील.'

पुढे बोलताना दळवी म्हणाले, 'सुनील तटकरेंनी रोह्याच नाव बदनाम केलं आहे. घोटाळेबाज म्हणून त्यांची राज्यभर ओळख आहे. आता रोह्याचे नाव बदनाम होण्याआधीच त्यांना रोह्यातून हद्दपार करा. ते चिंटींग करणारे आहेत. मी त्यांच्यावर जे आरोप केलेत ते खरे आहेत.'

'ज्यांनी त्यांना उभं केलं त्यांनी त्यालाच धक्का मारला. ज्याच्या हाताखाली काम केलं त्याला फसवलं. धक्का मारणं ही त्यांची संस्कृती आहे. रात्री 9 वाजता तटकरे कुटुंबाचे फोन बंद होतात त्यांना कुणाची पर्वा नाही. ते बॅग भरतात आणि दिल्लीत जातात.', असा निशाणा देखील दळवींनी तटकरेंवर साधला.

तटकरे कुटुंबावर टीका करताना दळवी यांनी नाव न घेता आदिती तटकरे, अनिकेत तटकरे यांच्यावर देखील निशाणा साधला. ते म्हणाले, काही जण सोन्याचा चमचा तोंडात घेऊन जन्माला आले आहेत.

सुनील तटकरे प्रत्युत्तर देणार

रायगडच्या राजकारणात सुनील तटकरेंच्या विरोधात सगळी शिवसेना एकवटली आहे. पालकमंत्रिपदावरून तटकेर विरुद्ध गोगावले हा वाद सुरू आहे. त्यातच दळवी हे देखील सातत्याने तटकरेंवर टीका करत आहेत. स्थानिक स्वराज संस्था निवडणुकीच्या पार्श्वभूमीवर हा वाद आणखी वाढतो आहे. दरम्यान, दळवी यांनी केलेल्या टीकेला सुनील तटकरे काय उत्तर देणार याकडे राष्ट्रवादीच्या कार्यकर्त्यांचे लक्ष लागले आहे.