Eknath Shinde Politics : श्रीकांत शिंदेंना नोटीस, एकनाथ शिंदे अमित शहांना भेटले; उदय सामंत यांनी 'त्या' दाव्यांवर स्पष्टच सांगितलं,'आम्ही दवाखाना...'

Uday Samant News : आमदार संजय शिरसाट यांनी गुरुवारी श्रीकांत शिंदे यांनी आयकर विभागाची नोटीस आल्याचे म्हटले होते. मात्र, त्यांच्या या वक्तव्यानंतर अवघ्या दोन तासातच त्यांनी माघार घेत असे काही झाले नसल्याचे सांगत सारवासारव केली. एकनाथ शिंदे दिल्ली दौऱ्यावर गेल्याने आणखीच संशय वाढला. त्यामध्ये आज (शुक्रवार) संजय राऊतांनी दावा केली की शिंदे हे अमित शाहांना भेटले. मुख्यमंत्रि‍पदासाठी आपण भाजपमध्ये येण्यास तयार असल्याचे त्यांनी सांगितले.

राऊत यांच्या दाव्याला मंत्री उदय सामंत यांनी उत्तर दिले आहे. ते म्हणाले, राऊत हे अंतरज्ञानी आहेत हे आज मला कळलं. बाकी कुणाला कळत नाही आणि त्यांना कळतं या या प्रकारे त्यांनी वक्तव्य केले आहे. जर एकनाथ शिंदेसाहेब अमित शहासाहेबांना भेटले असतील तर यांच्या पोटात दुखण्याचे कारण काय? त्यांच्या पोटदुखीवरचा माननीय एकनाथ शिंदेसाहेबांनी 'आपला दवाखाना' सुरू केला आहे.

'श्रीकांत शिंदे यांच्याबाबत संजय शिरसाट यांनी केलेले वक्तव्य हे गैरसमजातून होते. त्यांनी ते क्लिअर सांगितले आहे. संजय शिरसाटसाहेबांना का नोटीस आली त्याचा खुलासा देखील त्यांनी केला आहे. एकमात्र नक्की आहे की अनेक आमदारांना विचारले तर त्यांना देखील नोटीस आली आहे. संजय शिरसाटसाहेबांचा वेगळा विषय आहे म्हणून नोटीस आली आहे असे नाही.शिरसाटसाहेबांनी स्वतः खुलासा केला आहे. ', असे देखील सामंत म्हणाले.

फेर नेरॅटिव्ह...

राऊत यांच्या दाव्याबाबत बोलताना सामंत म्हणाले, एखादा फेक नेरॅटिव्ह सेट कसा करायचा हे लोकांना कळले आहे. जर एकनाथ शिंदेसाहेब हे मोदीसाहेबांना, अमित शाहासाहेबांना भेटले असतील तर त्यामध्ये वावगं आहे, असं मला वाटत नाही.

राऊत जे बोलतात ते होतं...

शिवसेना (उद्धव बाळासाहेब ठाकरे) पक्षाचे आमदार भास्कर जाधव म्हणाले, ‘तुम्ही संजय राऊत यांची मागील वक्तव्ये पाहा. त्यांनी जे जे दावे केले, ते तंतोतंत खरे ठरले आहेत. आताही त्यांनी जे बोलले आहे, तेच घडेल. थोडी वाट पाहा.’"