Uddhav- Raj Thackeray : उद्धव ठाकरे सहकुटुंब राज ठाकरेंच्या निवासस्थानी जाणार! निमंत्रण मिळालं, कारणही आहे खास!

Thackeray Brothers : मराठीच्या मुद्यावर आलेल्या ठाकरे बंधुंची युती होणार अशी चर्चा आहे. दोघांनी देखील तसे संकेत दिले आहेत. उद्धव ठाकरेंच्या निवासस्थानी जात राज ठाकरेंनी त्यांना वाढदिवसाच्या शुभेच्छा दिल्या होत्या. आता, उद्धव ठाकरे हे सहपरिवार राज ठाकरेंचे निवास्थान 'शिवतीर्थ'येथे जाणार आहेत.

दोन दिवसांपूर्वीच राज ठाकरे यांनी फोन करत गणेशोत्सवात गणपतीच्या दर्शनसाठी येण्याचे निमंत्रण उद्धव ठाकरेंना दिले होते. ते निमंत्रण उद्धव ठाकरेंनी स्वीकारल्याची माहिती असून ते सहपरिवार राज ठाकरे यांच्या घरच्या गणपतीच्या दर्शनासाठी जाणार आहे.

हिंदी सक्तीविरोधात राज ठाकरे आणि उद्धव ठाकरे पहिल्यादांच एका मंचावर आले होते. त्यामुळे आगामी महापालिकेत त्यांची ही युती होणार का? अशा चर्चा सुरू होत्या. मात्र, ठाकरे बंधुंनी आलं ठरलं असल्याचे सांगत यावर उघड बोलण्याचे टाळले होते.

उद्धव ठाकरेंच्या वाढदिवसा दिवशी राज ठाकरे मातोश्रीवर गेले आणि आता उद्धव ठाकरे हे राज ठाकरेंच्या निवासस्थानी जाणार असल्याने महापालिकेत दोन्ही भावांची युती होणार असल्याचे निश्चित मानले जात आहे.

राज ठाकरे हे तब्बल सहा वर्षानंतर मातोश्रीवर उद्धव ठाकरेंना देण्यासाठी गेले होते. त्या आधी ते अमित ठाकरेंच्या लग्नाचे आमंत्रण देण्यासाठी गेले होते. उद्धव ठाकरे हे राज ठाकरेंच्या निवासस्थानी पहिल्यांदाच जाणार आहेत.