Anil Deshmukh News : अनिल देशमुखांचे होम ग्राऊंडवर तब्बल 21 महिन्यांनी पाऊल; नागपुरात जाताच झाले भावूक

NCP News : राष्ट्रवादीचे नेते आणि माजी गृहमंत्री अनिल देशमुख यांना सीबीआय आणि ईडीच्या प्रकरणातून जामीन मिळाल्यानंतर ते आज पहिल्यांदाच नागपूरमध्ये आले आहेत. यावेळी राष्ट्रवादी काँग्रेसच्या कार्यकर्त्यांनी त्यांचे जंगी स्वागत केले. त्यांच्या स्वागतासाठी राष्ट्रवादीच्या कार्यकर्त्यांनी केलेली जय्यत तयारी पाहून देशमुखही भारावले.

अनिल देशमुख हे (Anil Deshmukh) तब्बल 21 महिन्यांनंतर आज नागपुरात दाखल झाले. त्यामुळे त्यांच्या कार्यकर्त्यांनी ढोल-ताशांच्या गजरात देशमुखांचं नागपूर विमानतळावर स्वागत केलं. कार्यकर्त्यांचं प्रेम पाहून देशमुखही भावूक झालेले यावेळी पाहायला मिळाले.

देशमुख यांच्यावर भ्रष्टाचाराचे आरोप झाले होते. त्यानंतर त्यांना ईडी आणि सीबीआयकडून अटक करण्यात आली होती. त्यानंतर त्यांना तब्बल 14 महिन्यानंतर जामीन मिळाला. मात्र, मुंबईतून तीन महिने बाहेर जाता येणार नाही, अशी अट मुंबई उच्च न्यायालयाने ठेवली होती.

त्यानंतर देशमुखांनी मुंबई बाहेर जाण्याची परवानगी न्यायालयाकडे मागितली होती. न्यायालयाने परवानगी दिल्यानंतर ते आज नागपूरला आपल्या मतदारसंघात आले. यावेळी राष्ट्रवादीच्या कार्यकर्त्यांनी शहरात 'टायगर इज बॅक'चे पोस्टर झळकवले.

यावेळी माध्यमांशी बोलताना देशमुख म्हणाले, ''21 महिन्यानंतर मी नागपुरात आलो आहे. त्यामुळे मला नागपुरात येऊन आनंद झाला. मला खोट्या गुन्ह्यामध्ये आत टाकण्यात आले होते. पण आता स्वगृही परतल्यामुळे आनंद झाला आहे'', असं म्हणत देशमुख भावूक झाल्याचे पाहायला मिळाले.

दरम्यान, 21 महिने अनिल देशमुख हे आपल्या मतदारसंघापासून दूर होते. त्यामुळे त्यांच्या मतदारसंघातील नागरिकांचे कामं रखडले होते. मात्र, आता ते मतदारसंघात दाखल झाल्यामुळे राष्ट्रवादीच्या कार्यकर्त्यांना बळ मिळणार आहे.