Santosh Deshmukh murder case: अण्णासाहेब मोरे यांनी आरोप फेटाळले, म्हणाले...

Valmik Karad News: सामाजिक कार्यकर्त्या तृप्ती देसाई यांनी केलेल्या आरोपांनी खळबळ उडाली आहे. वाल्मीक कराड आणि अण्णासाहेब मोरे यांचे संबंध असल्याचा दावा देसाई यांनी केला होता. या संदर्भात त्यांनी पोलिसांवरही ठपका ठेवला होता.

या संदर्भात आज सकाळी नाशिकच्या स्वामी समर्थ केंद्राचे प्रमुख अण्णासाहेब मोरे यांनी त्र्यंबकेश्वर येथे आपली बाजू मांडली. त्यांनी या प्रकरणात आपले हात झटकले आहे. मी कराड या वादग्रस्त संशयित अशी आपला कोणताही संबंध नसल्याचा दावा त्यांनी पत्रकार परिषदेत केला आहे.

ते म्हणाले, तृप्ती देसाई यांनी ज्या कालावधीचा उल्लेख केला आहे. त्या कालावधीत स्वामी समर्थ केंद्रात दत्त जयंतीचा उत्सव सुरू होता. या कालावधीत हजारो भाविक येऊन जातात. त्यापैकीच बीड येथील गुन्ह्याशी संबंधीत वाल्मीक कराड एक असावा. त्याच्याविषयी आम्हाला काहीही माहिती नाही.

हजारो भाविक आले. त्यापैकी वाल्मीक कराड एक होता. तो अन्य भाविकांप्रमाणेच दर्शनाला आला होता. त्याला आम्ही कोणतीही विशेष वागणूक दिलेली नाही. त्यामुळे त्याचा आणि आमचा काही संबंध आहे, हे म्हणणे तथ्यहीन आहे.

सीआयडी पोलीस पथक आमच्याकडे येऊन गेले. त्यांनी आमच्याकडे चौकशी केली. त्यांच्या मागणीप्रमाणे आम्ही त्यांना आश्रमातील सीसीटीव्ही फुटेज उपलब्ध करून दिले आहे. वाल्मीक कराड हे भाविक म्हणून येऊन गेले. मात्र आम्हाला त्यांची कोणतीही माहिती नाही. आमच्या दरबारात मुक्कामाची कोणतीही व्यवस्था नाही. त्यामुळे याबाबत झालेले सर्व आरोप तथ्यहीन आहेत, असेही गुरुमाऊली उर्फ अण्णासाहेब मोरे यांनी सांगितले.

तृप्ती देसाई यांनी केलेल्या आरोपात कोणतेही तथ्य नसल्याचा पुनरुच्चार मोरे यांनी केला आहे. ते म्हणाले, आमच्या मंदिरात लाखो लोक येतात. इथे कधीही चुकीच्या प्रवृत्तींना संरक्षण दिले जात नाही.

अण्णासाहेब मोरे यांनी श्रीमती देसाई यांचे आरोप फेटाळले आहे. त्यामुळे श्रीमती देसाई यांनी आपल्याकडे व्हिडिओ फुटेज आणि ऑडिओ उफलब्ध होणार असल्याचा देखील दावा केला होता. या पार्श्वभूमीवर आता श्रीमती देसाई काय भूमिका घेतात आणि काय उत्तर देतात याचीही उत्सुकता आहे. अण्णासाहेब मोरे यांनी आपली भूमिका स्पष्ट केल्याने वाल्मीक कराड यांच्याशी संबंधित स्वामी समर्थ केंद्राच्या आरोप प्रत्यारोपात काय होते, हे लवकरच स्पष्ट होईल.

-----