Ashok Kharat : अशोक खरातला गुपचूप नाशिकमधून हलवले, ईडीने ताबा घेताच मोठा निर्णय, आता तपासाचे नवे केंद्र...

Ashok Kharat News : वादग्रस्त भोंदू कॅप्टन अशोक खरात याच्या विरोधातील 11 गुन्ह्यांचा तपास पोलिसांनी पूर्ण केला आहे. आता या संदर्भात नऊ गुन्ह्यांतील आरोपपत्र दाखल करण्याची प्रतीक्षा आहे. तो 69 दिवसांपासून पोलिसांच्या कोठडीत होता.

दोन दिवसांपूर्वी पोलिसांनी कॅप्टन अशोक खरातचा ताबा ईडीला दिला होता. ईडीकडून कोपरगाव आणि सिन्नर येथील पतसंस्थांमध्ये 92 बेनामी खात्यांचा तपास सुरू आहे. मध्ये 70 कोटी रुपयांच्या बेनामी व्यवहारांची तपासणी सुरू आहे.

भोंदू कॅप्टन अशोक खरात यांनी कोपरगाव येथील समता पतसंस्थेत साठ बेनामी खाते उघडली होती. सिन्नर येथील जगदंबा पतसंस्थेत बत्तीस बेनामी खाते आहेत. या खात्यांमधून मोठ्या प्रमाणावर आर्थिक व्यवहार झाले होते.

मंगळवारी सकाळी ईडीकडून पुढील कारवाई करण्यात आली. 70 कोटी रुपयांचे व्यवहार आणि त्यातील बेनामी पैसे यांचा तपास करण्यासाठी अशोक खरातला गुपचूप मुंबईला हलविण्यात आले. नाशिक रोड मध्यवर्ती कारागृहातून ताबा घेतल्यानंतर मुंबईच्या कार्यालयात खरातला नेण्यात आले. या संदर्भात मोठ्या प्रमाणावर गोपनीयता पाळण्यात आली. यापुढे कॅप्टन खरात याच्या तपासाचे केंद्र आता मुंबई असेल.

ईडीकडून बेनामी व्यवहारांची चौकशी होणार आहे. त्यात राज्य महिला आयोगाच्या माजी अध्यक्ष रूपाली चाकणकर तसेच त्यांच्या भगिनी आणि कोपरगाव येथील समता पतसंस्थेचे अध्यक्ष काका कुयटे यांची यापूर्वीच चौकशी झाली आहे. खरात याने दोन्ही पतसंस्थांमधील बेनामी पैशांचा वापर जमिनींच्या खरेदीसाठी केला आहे. या पैशांतून पत्नीच्या नावे मोठ्या प्रमाणावर जमिनी खरेदी केल्या आहेत. यातील अनेक व्यवहार अद्यापही पोलिस आणि ईडीच्या तपासापासून लांब आहेत. या व्यवहारांची माहिती उघड झालेली नाही.

राजकीय नेते रडावर?

ईडीचा तपास सुरू झाल्याने त्यात राजकीय अँगल शोधला जाण्याची शक्यता आहे. विरोधकांनी यामध्ये तीन मंत्र्यांचा संबंध असल्याचा आरोप यापूर्वीच केला आहे. याशिवाय विविध राजकीय पक्षांचा संबंध जोडला जात आहे. त्यामुळे कॅप्टन खरातच्या ईडीच्या तपासाने काही राजकीय नेत्यांना चांगलाच धसका घेतला आहे. यात काही राजकीय नेते रडारवर येतात का याची उत्सुकता आहे.