Bacchu Kadu Politics: बच्चू कडू यांनी आव्हान स्वीकारले, थेट गुलाबराव पाटील यांच्या घरीच जाणार!

Bacchon Kadu Vs Gulabrao Patil News: केळी उत्पादक शेतकऱ्यांच्या समस्या आणि कर्जमाफी या विषयावर शिवसेना उद्धव ठाकरे पक्षाने जळगाव शहरात आक्रोश मोर्चा काढला. या मोर्चावरून पालकमंत्री गुलाबराव पाटील आणि विरोधकांमध्ये राजकारण रंगले आहे.

माजी खासदार उन्मेश पाटील यांच्या नेतृत्वाखाली आक्रोश मोर्चा झाला. यामध्ये माजी आमदार बच्चू कडू यांसह विविध नेते सहभागी झाले. यावेळी जिल्हाधिकारी निवेदन घेण्यास आले नाही. त्यामुळे संतापलेले शेतकरी गेट तोडून जिल्हाधिकारी कार्यालयात घुसले होते.

जिल्हाधिकारी कार्यालयात झालेल्या गोंधळानंतर पालकमंत्री गुलाबराव पाटील यांनी बच्चू कडू यांना आव्हान दिले होते. माजी आमदार कडू यांनी माझ्या गावात येऊन दाखवावे. त्यांना योग्य धडा शिकवल्याशिवाय सोडणार नाही, असे आव्हान मंत्री पाटील यांनी दिले.

त्या पाठोपाठ माजी खासदार उन्मेश पाटील, माजी आमदार कडू यांसह १३ नेत्यांविरोधात पोलिसांमध्ये गुन्हा दाखल करण्यात आला. हे गुन्हे दाखल करण्यात पालकमंत्री पाटील यांचा राजकीय दबाव होता, असा आरोप कडू यांनी केला होता. आता हे राजकारण वेगळ्याच दिशेला जात आहे.

बच्चू कडू यांनी पालकमंत्री गुलाबराव पाटील यांचे आव्हान स्वीकारत असल्याचे जाहीर केले. गुलाबराव पाटील शेतकरी पुत्र होते. विधीमंडळात त्यांचा आवाज शेतकऱ्यांसाठी आक्रमक होता. आता तो राहिलेला नाही.

सध्या मात्र गुलाबराव पाटील यांचा शेतकऱ्यांसाठी घुमणारा आवाज हरवला आहे. शेतकरी पुत्र म्हणून तुमचा आवाज आम्ही पाहिला तो आता दबला गेला आहे. तो दबू नये म्हणून आम्ही तुमच्यावर बोललो, असे कडू म्हणाले.

मंत्री पाटील यांचे आव्हान आपण स्वीकारले आहे. आम्ही ५ ऑक्टोबरला जळगावला येऊन आंदोलन करणार. मंत्री पाटील यांच्या घरी देखील जाणार. ते शेतकरी पुत्र म्हणून की सत्ता पुत्र म्हणून स्वागत करतात याची आम्हाला उत्सुकता आहे.

मंत्री पाटील हे आता राज्याचे मंत्री आहेत. एका गावाचे राहिलेले नाहीत. त्यामुळे आम्ही त्यांचे इच्छा जरूर पूर्ण करणार. ते म्हटले तर त्यांच्या घरी देखील जाणार, ते काय व्यवस्था करतात याची उत्सुकता आहे.

-------