Central Government Joint Committee : ऊस उत्पादक शेतकऱ्यांच्या समस्या आणि साखर उद्योगासमोरील आव्हानांवर तोडगा काढण्यासाठी केंद्र सरकारने स्थापन केलेल्या संयुक्त समितीची पहिली बैठक नवी दिल्लीत झाली. देशातील साखर उद्योगाचा सर्वांगीण आणि शाश्वत विकास साधण्यासाठी नवी मार्गदर्शक तत्त्वे तयार करण्याच्या दृष्टीने समितीने पावले उचलली आहेत.
या प्रक्रियेत ऊस उत्पादक शेतकरी, साखर कारखानदार, राज्य सरकारे आणि कृषी क्षेत्रातील तज्ज्ञांची मते जाणून घेतली जाणार आहेत. केंद्रीय मंत्री प्रल्हाद जोशी यांच्या कार्यालयाने प्रसिद्ध केलेल्या पत्रकातून ही माहिती देण्यात आली.
रमेश चंद्र यांच्या अध्यक्षतेखालील संयुक्त समितीच्या पहिल्या बैठकीत ऊस उत्पादक (SugarCane) शेतकऱ्यांच्या समस्या आणि साखर उद्योगासमोरील विविध आव्हानांचा आढावा घेण्यात आला. या प्रश्नांचा सखोल अभ्यास करून व्यवहार्य उपाययोजना सुचवण्यासाठी संबंधित घटकांशी व्यापक चर्चा करण्याचा निर्णय बैठकीत घेण्यात आला.
यासाठी राज्य सरकारे, साखर कारखाने, ऊस उत्पादक शेतकरी (Farmer) आणि कृषी शास्त्रज्ञांशी सल्लामसलत केली जाणार आहे. या चर्चेतून मिळणाऱ्या सूचना आणि शिफारशींच्या आधारे साखर उद्योगाच्या विकासासाठी पुढील धोरणात्मक दिशा निश्चित करण्याचा समितीचा प्रयत्न असेल.
समितीच्या सल्लामसलत प्रक्रियेत ऊस उत्पादकांच्या संघटना, साखर कारखानदारांच्या संघटना आणि महासंघ यांचाही सहभाग असेल. याशिवाय, साखर आणि ऊस क्षेत्रातील प्रमुख संशोधन संस्थांकडूनही सूचना मागवण्यात येणार आहेत. महाराष्ट्र, कर्नाटक, उत्तर प्रदेश आणि हरियाणा या प्रमुख ऊस उत्पादक राज्यांतील शास्त्रज्ञ, संशोधक आणि कृषी विद्यापीठांच्या प्रतिनिधींची मते जाणून घेतली जाणार आहेत. त्यामुळे ऊस शेती आणि साखर उद्योगाशी संबंधित प्रश्नांचा विविध राज्यांच्या अनुभवांच्या आधारे अभ्यास करता येणार आहे.
साखर उद्योगाचा दीर्घकालीन विकास साधण्यासाठी वैज्ञानिक दृष्टिकोनातून सूचना आणि शिफारशी स्वीकारण्याचे समितीचे नियोजन आहे. ऊस उत्पादकांच्या विविध मागण्यांचा अभ्यास करून शेतकरी आणि क्षेत्रातील तज्ज्ञांकडून वस्तुनिष्ठ मते घेतली जाणार आहेत. या प्रक्रियेतून तयार होणाऱ्या अहवालात संबंधित घटकांच्या सूचना समाविष्ट केल्या जाणार आहेत. त्याआधारे देशातील साखर उद्योगासाठी स्थिर, सर्वसमावेशक आणि शाश्वत धोरणात्मक आराखडा तयार करण्याचा प्रयत्न केला जाणार आहे. संयुक्त समितीची पहिली बैठक या दृष्टीने महत्त्वाची मानली जात आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.