Nashik News, 23 Sep : नाशिक महापालिका निवडणुकीसाठी भाजपचे शंभर प्लस उद्दिष्ट आहे. जलसंपदा मंत्री गिरीश महाजन यांनी त्यासाठी आक्रमक धोरण स्वीकारले आहे. मात्र सध्या भाजप स्वतःच राजकीय जाळ्यात अडकला आहे.
गुन्हेगारीशी संबंधित नेत्यांवर पोलीस कायद्यानुसार कारवाई करेल. भाजप कधीही गुन्हेगारांना मदत करत नाही, असं जलसंपदा मंत्री गिरीश महाजन यांनी स्पष्ट केले आहे. मंत्री महाजन यांनी आपली भूमिका स्पष्ट केली आहे.
मात्र जगदीश पाटील आणि उद्धव निमसे हे भाजपचे दोन प्रमुख नगरसेवक आहेत. ते सध्या खुनाच्या गुन्ह्यात पोलीस कोठडीत आहेत. यापूर्वीही शिवसेनेचे उपनेते सुधाकर बडगुजर यांच्यावर मुंबई बॉम्बस्फोटातील आरोपींची संबंध असल्याचे आरोप होते. हे आरोप भाजपच्याच नेत्यांनी केले होते.
नितेश राणे यांनी विधिमंडळात त्याबाबत फोटो झळकवत कारवाईची मागणी केली होती. पोलिसांत गुन्हे दाखल असलेले आणि वादग्रस्त नेते सध्या भाजपमध्ये आहेत. इतर वादग्रस्त नेत्यांनाही भाजपमध्ये प्रवेशासाठी रेड कार्पेट अंथरले जात आहे. स्थानिक नेत्यांनी त्याला विरोध केला आहे.
भाजपची नाशिक शहरातील स्थिती आणि नेते यांच्यावर होणारी पोलिसांची कारवाई पक्षाची अडचण करणारा आहे. माजी नगरसेवक जगदीश पाटील सागर जाधव यांच्यावर झालेल्या गुन्हेगारी टोळीच्या गोळीबारात सहभागी असल्याने अटकेत आहेत.
गोळीबार करणाऱ्या निकम टोळीशी भाजपच्या नेत्यांचे संबंध आहेत, असा दावा पोलिसांनी केला आहे. विशेष म्हणजे ज्याच्यावर गोळीबार झाला तो सागर जाधव हा देखील भाजपच्याच आमदाराशी संबंध असल्याचा दावा केला जातो. त्यामुळे नाशिक शहरात भाजपच्या नेत्यांना त्याची उत्तरे देताना अडचणी होत आहेत.
शहरातील कायदा आणि सुव्यवस्था या विषयावर ठाकरेंची शिवसेना आक्रमक आहे. त्यांनी गेल्या आठवड्यात मोठे शक्ती प्रदर्शन करीत सरकारला इशारा दिला होता. पोलिसांनी गुन्हेगारी नियंत्रित करून नाशिक शहराला आणि शहरवासीयांना दिलासा द्यावा अशी मागणी केली होती.
भाजपचे दोन नगरसेवक पोलीस कोठडीत आहेत. नेत्यांवर गंभीर आरोप आहेत. महापालिका निवडणुकीच्या आधीच गुन्हेगारीशी संबंधित नेत्यांमुळे पक्ष राजकीय आरोपांच्या जाळ्यात अडकला आहे. त्याला उत्तरे देताना मात्र सगळ्यांचीच धावपळ होत आहे. त्याचा आगामी महापालिका निवडणुकीवर परिणाम होतो की काय या चिंतेने भाजप नेते त्रस्त आहेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.