Chhagan Bhujbal : मराठा आरक्षण; भुजबळांच्या भूमिकेला घरातूनच मिळाले आव्हान!

Manmad Political News : सध्या मंत्री छगन भुजबळ आणि आमदार सुहास कांदे हे एकाच सरकारमध्ये आहेत. भुजबळ कांदे यांच्याशी वाद करायला तयार नाही. त्यासाठी आम्हाला पुढे करून वापर केला जातो. भुजबळांनी सत्तेत सहभागी व्हायचे, आम्ही विरोधकांशी लढायचे हे अजिबात मान्य नसल्याने त्यांची साथ सोडल्याचा बेधडक आरोप माजी आमदार संजय पवार यांनी केला आहे.

मनमाड बाजार समितीत (Nandgaon) तसेच नांदगाव विधानसभा मतदारसंघातील छगन भुजबळ (Chhagan Bhujbal) गटाला जोरदार हादरा बसला आहे. याबाबत माजी आमदार संजय पवार (NCP) यांनी भुजबळ सत्तेत सहभागी झाल्याने त्यांच्यावर गंभीर आरोप केले.

राज्याचे अन्न व नागरी पुरवठा मंत्री आणि ओबीसी नेते छगन भुजबळांच्या मराठा समाजाच्या आरक्षणाबाबत मराठा समाजात असंतोष आहे. विशेषतः तरुण वर्गात त्याबाबत नाराजी आहे. त्यामुळे जो मराठा भुजबळांबरोबर जातो त्याला प्रश्न केले जातात. त्याचे पडसाद नांदगाव मतदारसंघात उमटले आहेत. भुजबळ यांना त्यांच्या गटातूनच आव्हान मिळाले आहे.

मराठा समाजाच्या आरक्षणाबाबतची भूमिका मान्य नाही. मराठा समाजातील अनेकांनी त्याबद्दल नाराजी व्यक्त केली. त्यामुळे भुजबळांची साथ सोडत राष्ट्रवादी काँग्रेसचे नेते, मनमाड बाजार समितीचे सभापती तसेच माजी आमदार संजय पवार यांनी पक्ष व सभापतीपदाचा राजीनामा दिला आहे. या राजीनाम्यामुळे नांदगाव मतदारसंघातील राजकारणाला कलाटणी मिळण्याची शक्यता आहे.

याबाबत माजी पवार यांनी बाजार समितीतील भुजबळ गटाचे संचालक तसेच पक्षाच्या नेत्यावंर देखील टिका केली. संचालक विठ्ठल आहेर यावेळी उपस्थित होते.

शिवसेना ठाकरे गटाचे जिल्हाप्रमुख गणेश धात्रक, राष्ट्रवादी काँग्रेसचे शहराध्यक्ष दीपक गोगड मला जाणून बुजून त्रास देत होते. त्यांनी राजीनामा देऊन पुन्हा निवडून येऊन दाखवावे, असे आव्हान त्यांनी दिले.

मराठा समाजाच्या आरक्षणाबाबत मंत्री छगन भुजबळांची भूमिका स्पष्ट नाही. त्यांचा आरक्षणाला विरोध पाहून अनेक मराठा तरुण आक्रमक झाले आहे. भुजबळ हे केवळ देखावा आहे. ते विरोध घ्यायला तयार नाही. आम्हाला विरोध म्हणून पुढे केले जाते. ते तडजोडी करतात, मात्र आम्हाला दोष दिला जातो. त्याला कंटाळून त्यांच्यापासून बाजूला होत आहे.