Shirdi voter list issue : मंत्री विखेंच्या शिर्डीत मतदार यादीतील घोळ पुन्हा चर्चेत; 'स्थानिक'साठी काँग्रेसनं टाकला मोठा डाव

Local body elections Maharashtra : स्थानिक स्वराज्य संस्थांच्या निवडणुकीच्या पार्श्वभूमीवर मतदार याद्यांमधील घोळ पुन्हा चर्चेत आला आहे. महाविकास आघाडीतील मित्र पक्ष मतदार याद्यांवर जोरदार काम करत असून, त्यातील घोळावरून थेट प्रशासनाला इशारा देत आहेत.

भाजप मंत्री राधाकृष्ण विखे पाटील यांच्या शिर्डी विधानसभा मतदारसंघातील मतदार याद्यांतील घोळ काँग्रेसने पुन्हा उकरून काढला आहे. शिर्डी नगरपरिषदेच्या निवडणुकीला सामोरे जाताना, मतदार याद्यांतील घोळ दुरुस्त केला नाहीतर निवडणुकीवर बहिष्कार घालण्याचा इशारा दिला आहे. काँग्रेसच्या या भूमिका शिर्डीतील मतदार याद्यांचा घोळ पुन्हा चर्चेत आला आहे.

शिर्डीतील काँग्रेसचे (Congress) पक्षाचे शहराध्यक्ष सचिन चौघुले यांनी शिर्डीतील मतदार याद्यांतील घोळांवर प्रतिक्रिया देताना प्रशासनाला इशारा दिला आहे. शिर्डी नगरपरिषद निवडणुकीसाठी जाहीर झालेल्या प्रारूप मतदार याद्यात घोळ असल्याचा आरोप करताना, काँग्रेसने नगरपरिषद निवडणुकीवर बहिष्कार घालण्याचा निर्णय घेतला आहे. मतदार याद्यातील घोळ मिटेपर्यंत निवडणूक प्रक्रियेत सहभाग न घेण्याचा इशारा दिला आहे.

शिर्डी (Shirdi) नगरपरिषदेच्या प्रारूप मतदार याद्यांमध्ये अनेकांची नावे दोन-तीन वेळा असून, पत्तेही वेगवेगळ्या ठिकाणचे असल्याचे स्थानिकच्या काँग्रेस पदाधिकाऱ्यांनी समोर आणलं आहे. त्यामुळे याद्यातील हा घोळ मिटेपर्यंत निवडणूक प्रक्रियेत सहभागी न होण्याचा निर्णय शिर्डी शहर काँग्रेसने घेतला आहे, अशी माहिती सचिन चौघुले यांनी सांगितलं.

सचिन चौघुले म्हणाले, "शिर्डीतील मतदार यादीमध्ये एकच नाव तीन-तीन ठिकाणी आहे. मतदान कार्ड आयडी मात्र वेगवेगळे आहेत. हा सगळा मोठा घोटाळाच आहे. काँग्रेसकडून मतदार यादीवर काम सुरू केलं आहे. 15 मतदारांची असू दे किंवा, 1500 मतदारांची चोरी असू देत, ती चोरीच आहे. प्रारूप मतदार यादी प्रसिद्ध करताना, ती 'अल्फाबेटिकल' केलेली नाही. इथूनच हा घोळ सुरू झालेला आहे."

मतदार वेबसाइटवर सर्च होत नाही

सचिन चौघुले यांनी, 'शिर्डी मतदार यादीतील घोळ सांगताना, दशरथ वाघमारे नावाच्या मतदाराचे उदाहरण दिले. या नावाने दोन व्होटर आयडी आहेत. आयोगाच्या वेबसाइटला गेल्यावर एक व्होटर आयडी सर्च होतो. दुसरा आयडी मात्र सर्च होत नाही. असे असताना ही नाव मतदार यादीत आली कुठून. यावरून निकालाचा अंदाज लगेच येतो. तहसीलदार, जिल्हा प्रशासन, निवडणूक आयोगाकडे यासंदर्भात आम्ही तक्रार करणार आहोत. यावर देखील कार्यवाही न झाल्यास निवडणुकीमध्ये काँग्रेस सहभागी होणार नाही,' असे सांगितले.

शिर्डी प्रभाग रचनेत मोठा घोटाळा

शिर्डी नगरपरिषदेच्या प्रभाग रचनावर देखील सचिन चौघुले यांनी प्रतिक्रिया दिली. ते म्हणाले, "प्रभाग रचनेत मोठा घोळ केलेला आहे. काही प्रभाग निश्चित करताना, मतदार यादीत पाच हजार मतदान होती. पण मतदार यादी अंतिम केल्यानंतर त्यात सहा हजार मतदार आले. मग हे मतदार आले कोठून?" प्रभाग पाच, सहा, सातमध्ये असेच घोळ झालेले आहेत. काही ठिकाणी मतदार कमी केले आहेत. कमी केलेले मतदार नेमकी गेली कोठे? या सर्व बाबी घेऊन आम्ही जिल्हा प्रशासनाकडे, निवडणूक आयोगाकडे तक्रार करणार आहोत, असेही सचिन चौघुले यांनी सांगितले.

राहुल गांधींनी उपस्थित केलेला मुद्दा

दरम्यान, काँग्रेस नेते राहुल गांधी यांनी मत चोरीचा मुद्दा काढल्यानंतर, तो देशभर गाजत आहे. महाराष्ट्र विधानसभा निवडणुकीत मंत्री राधाकृष्ण विखे पाटील यांच्या शिर्डी मतदारसंघाचा उल्लेख थेट त्यांनी लोकसभा सभागृहात केला. यानंतर भाजप आणि काँग्रेसमध्ये चांगलेच राजकारण तापले. स्थानिक स्वराज्य संस्थांच्या निवडणुकीच्या तोंडावर महाविकास आघाडीतील आणि त्यांच्याबरोबर असलेल्या मित्रपक्षांनी मतदार याद्यांवर बारकाईनं काम सुरू केलं आहे. त्यामुळे निवडणुकीच्या मतदार घोटाळ्याचा मुद्दा चांगलाच तापणार असे दिसते आहे.