Dhule Drought Politics : धुळ्यात दुष्काळाचे राजकारण पेटले; ठाकरेंची शिवसेना रस्त्यावर, भाजप नेते पोहोचले वर्षावर!

Dhule Drought Shivsena UBT News: धुळे जिल्ह्यात गेल्या सुमारे ५० दिवसांपासून पावसाने दडी मारल्याने ऐन पावसाळ्यात टंचाईसदृश परिस्थिती निर्माण झाली आहे. पावसाअभावी शेती आणि पिके संकटात सापडली असून शेतकऱ्यांसमोर मोठे संकट उभे ठाकले आहे. विशेष म्हणजे जिल्ह्यातील सर्व विधानसभा मतदारसंघांत सत्ताधारी महायुतीचे आमदार आहेत आणि जयकुमार रावल हे जिल्ह्याचे पालकमंत्री आहेत.

पण रावल मागील काही दिवसांपासून मुलाच्या वाढदिवसाच्या जंगी सेलिब्रेशनमध्ये व्यस्त असल्याने सत्ताधारी भाजपची राजकीय कोंडी होण्याची चिन्हे आहेत. दुष्काळाची तीव्रता वाढत असताना विरोधकांनी सरकारविरोधात आक्रमक भूमिका घेतली आहे. शिवसेना उद्धव बाळासाहेब ठाकरे पक्षाने जिल्हाधिकारी कार्यालयासमोर निदर्शने करत शासनाचे लक्ष दुष्काळाकडे वेधले.

पाऊस गायब, शेती संकटात; शेतकऱ्यांची चिंता वाढली

धुळे जिल्ह्यात पावसाने दीर्घकाळ पाठ फिरवल्याने खरीप पिकांवर संकट निर्माण झाले आहे. पाण्याची उपलब्धता कमी होत असल्याने शेतीबरोबरच पिण्याच्या पाण्याचा आणि चाऱ्याचा प्रश्नही गंभीर होण्याची भीती व्यक्त केली जात आहे. शेतकऱ्यांसमोरील ही परिस्थिती लक्षात घेऊन शासनाने तातडीने उपाययोजना कराव्यात, अशी मागणी आता जोर धरू लागली आहे.

ठाकरे गटाचा जिल्हाधिकारी कार्यालयासमोर एल्गार

दुष्काळाच्या प्रश्नावर शिवसेना उद्धव बाळासाहेब ठाकरे पक्षाने आक्रमक भूमिका घेत जिल्हाधिकारी कार्यालयासमोर आंदोलन केले. जिल्हाप्रमुख अतुल सोनवणे, नरेंद्र परदेशी, निंबा मराठे, महानगरप्रमुख धीरज मराठी यांच्यासह पदाधिकाऱ्यांनी सरकारच्या भूमिकेवर सवाल उपस्थित केले. शासनाने शेतकऱ्यांच्या नुकसानीचे पंचनामे करण्याची वाट न पाहता तातडीने मदत जाहीर करावी, अशी मागणी आंदोलकांनी केली.

हेक्टरी एक लाख रुपये मदतीची मागणी

दुष्काळामुळे शेतीचे मोठे नुकसान होत असल्याचा दावा करत ठाकरे गटाने प्रति हेक्टरी एक लाख रुपये अनुदान देण्याची मागणी केली आहे. यासोबतच पाणी आणि चारा टंचाईवर तातडीने उपाययोजना कराव्यात, पिण्याच्या पाण्यासाठी आवश्यक त्या ठिकाणी टँकर सुरू करावेत आणि शेतकऱ्यांचा सातबारा सरसकट कोरा करावा, अशा मागण्याही करण्यात आल्या आहेत.

कुणाल पाटील थेट फडणवीसांच्या दारी

दरम्यान, धुळ्यातील दुष्काळाची परिस्थिती लक्षात घेऊन माजी आमदार कुणाल पाटील यांनी थेट मुख्यमंत्री देवेंद्र फडणवीस यांची भेट घेतली. वर्षा निवासस्थानी झालेल्या भेटीत त्यांनी जिल्ह्यातील पावसाची स्थिती आणि शेतकऱ्यांसमोरील संकट मुख्यमंत्र्यांच्या निदर्शनास आणून दिले.

दुष्काळावरून धुळ्यात राजकारण तापले

धुळे जिल्ह्यातील दुष्काळाचा प्रश्न आता केवळ शेती आणि पाण्यापुरता मर्यादित राहिलेला नाही. या मुद्द्यावरून राजकीय वातावरणही तापू लागले आहे. एकीकडे ठाकरे गटाने आंदोलनाचा इशारा देत सरकारला घेरण्याची तयारी केली आहे, तर दुसरीकडे कुणाल पाटील यांनी मुख्यमंत्र्यांची भेट घेऊन दुष्काळाचा प्रश्न थेट सरकारसमोर मांडला आहे.

या पार्श्वभूमीवर जिल्ह्याचे पालकमंत्री जयकुमार रावल यांची भूमिका काय असणार आणि धुळेकर शेतकऱ्यांना तातडीची मदत मिळणार का, याकडे आता जिल्ह्यातील शेतकऱ्यांचे लक्ष लागले आहे. दुष्काळाची परिस्थिती आणखी गंभीर झाल्यास विरोधकांचा सरकारविरोधातील आक्रमकपणा वाढण्याची शक्यता आहे. त्यामुळे धुळ्यातील पाऊस आणि पाण्याच्या प्रश्नासोबतच आता दुष्काळाच्या राजकारणाचीही परीक्षा सत्ताधारी भाजपची होणार आहे.