Narhari Zirwal : दिंडोरीत मंत्री झिरवाळांची प्रतिष्ठा पणाला, गटाची तहान गणावर भागवावी लागणार

Dindori election : विधानसभेची निवडणूक संपल्यानंतर प्रथमच मोठी निवडणूक येऊ घातल्याने आजी- माजी आमदारांसह प्रमुख पक्षांच्या जिल्हा अध्यक्षांसह सर्वच पदाधिकाऱ्यांची प्रतिष्ठा पणाला लागणार आहे. जिल्हा परिषद पंचायत समिती निवडणुकानंतर काही दिवसातच दिंडोरी नगरपंचायत निवडणुका असल्याने जिल्हा परिषद पंचायत समिती निवडणूक पदाधिकारी प्रतिष्ठेची करणार अशी स्थिती आहे.

पंचायत समितीच्या गणांचे आरक्षण जाहीर झाले आहे. यात खेडगाव, मातेरवाडी व पालखेड बंधारा हे गण ओबीसी झाले आहेत. तर मोहाडी गण हा सर्वसाधारण राखीव झाला आहे. त्यामुळे सर्व इच्छुकांनी आता लगेचच तयारीला सुरुवात केली आहे. जिल्हा परिषद आरक्षण जाहीर झाल्यानंतर अनेकांच्या नजरा पंचायत समितीच्या आरक्षणाकडे लागल्या होत्या. यामुळे काही मातब्बर पुढाऱ्यांना जिल्हा परिषद नाहीतर किमान पंचायत समिती लढण्याची संधी उपलब्ध झाली असल्या मुळे दुधाची तहान आता ताकावर भागवावी लागणार आहे.

तरी मातब्बर जिल्हा परिषदेनंतर पंचायत समितीत आपले नशीब आजमावतील का हे येणारा काळच ठरवेल. असे असले तरी जिल्हा परिषद गट आरक्षणात कमालीची नाराजी मातब्बरांमध्ये निर्माण झाले असल्याने आता पुन्हा बारापैकी खेडगाव, मातेरेवाडी, मोहाडी व पालखेड बंधारा यातील तीन गण ओबीसी तर अवघा एक गण जनरल साठी असल्याने आता या जागांवर काही आयाराम गयाराम येऊन विद्यमानांना धक्का देणार का असाही प्रश्न आता निर्माण होणार असून असे झाल्यास सध्याची निवडणूक पक्षश्रेष्ठींना डोकेदुखी ठरू शकते हे मात्र नक्की.

बदलत्या आरक्षणामुळे जिल्हा परिषदेची प्रमुख पदे भूषविणाऱ्या अनेक पदाधिकाऱ्यांना आता पंचायत समितीचे निवडणूक लढावी लागते की काय अशी अवस्था आहे .यातच खेडगाव व मोहाडीमधील दोन्ही गण ओबीसी व जनरल असल्याने जिल्हा परिषदेत पदे भूषवणाऱ्यांसाठी पर्यायी ठरू शकतात.

राष्ट्रवादी काँग्रेस, शिवसेना व भाजप यांची सर्वस्वी जबाबदारी विद्यमान आमदार, माजी आमदार, जिल्हा पदाधिकारी व भाजप सर्वच नगरसेवक व पदाधिकाऱ्यांवर असणार आहे. शिवसेना (उबाठा) राष्ट्रवादी (शरदचंद्र पवार) काँग्रेस व काँग्रेस या पक्षांची जबाबदारी विद्यमान खासदार, पक्षाचे आजी-माजी जिल्हाध्यक्ष व पक्ष पदाधिकारी यांच्यासह कार्यकर्त्यांवर राहणार आहे.