Honey Trap : खडसे म्हणतात, मला लोढाने महाजनांच्याच 'गुलाबी' गोष्टी सांगितल्या..

Eknath Khadse : हनी ट्रॅप प्रकरणात जळगावच्या प्रफुल्ल लोढाला अटक झाल्यापासून मंत्री गिरीश महाजन व एकनाथ खडसे यांच्यात वाक्युद्ध रंगले आहे. एकनाथ खडसेंनी लोढा व महाजन यांचे जवळचे संबंध असल्याचा आरोप केला होता. त्यानंतर महाजन यांनी एकनाथ खडसे यांचाच प्रफुल्ल लोढा सोबतचा फोटो एक्सवर शेअर करुन खळबळ उडवून दिली होती. महाजनांच्या एक्स'पोस्टला उत्तर देताना खडसेंनी आता खळबळजनक दावा केला आहे.

महाजनांनी पोस्ट केलेल्या फोटोमध्ये प्रफुल्ल लोढा एकनाथ खडसेंना गुलाबी फुलांचा बुके देताना दिसत आहे. तसेच गिरीश महाजन यांनी पोस्ट करत म्हटलं होतं की, एकनाथ खडसे... तुमच्या या "गुलाबी गप्पा" कोणासोबत रंगल्या आहेत? ये रिश्ता क्या कहलाता है? तुमचे हे षडयंत्र जनतेसमोर उघड होतंय… हाच तो प्रफुल्ल लोढा ज्याला तुम्ही दारूडा बोलला होतात ? हाच तोच प्रफुल्ल लोढा ज्याने तुमच्यावर स्वतःच्या मुलाच्या खुनाचा आरोप केलेला आहे...

२०१९ ते २०२२ च्या दरम्यान अश्या खोट्या पुराव्यांचा आधारे सत्तेचा गैरवापर करून तुम्ही माझ्यावर असंख्य आरोप केले. त्या प्रत्येक आरोपाची चौकशी झाली, अगदी आर्थिक गुन्हे शाखेकडूनही माझी चौकशी झाली, पण त्यातून काहीही निष्पन्न झाले नाही. मी निर्दोष आहे हेच वारंवार सिद्ध झाले. याबद्दल सविस्तर बोलेलच... आता तुमच्याच म्हणण्यानुसार जो लोढा दारूडा आहे त्याच प्रफुल्ल लोढाचा आधार घेऊन माझ्यावर बिनबुडाचे आरोप करताय ? एकनाथ खडसे… काय तुझी हि व्यथा...! अशी पोस्ट महाजन यांनी शेअर केली होती.

यावर आता एकनाथ खडसे यांनी महाजन यांना प्रत्युत्तर दिलं आहे. लोढाने मला मंत्री गिरीश महाजन आणि रामेश्वर नाईकांच्या गुलाबी गोष्टी सांगितल्या, असा खळबळजनक दावा खडसेंनी केला आहे. प्रफुल्ल लोढा आणि मी एकाच गाडीमध्ये प्रवास केला त्यामुळे आमच्या गप्पा झाल्या. 'प्रफुल्ल लोढाकडे महाजन आणि रामेश्वर नाईक यांच्या अश्लील गोष्टी असल्याचे त्यावेळी प्रफुल्ल लोढा यांनी सांगितले होते, म्हणून आमची ती भेट होती असं एकनाथ खडसे म्हणाले.

प्रफुल्ल लोढा यांनी मंत्री गिरीश महाजन आणि रामेश्वर नाईक यांची सीडी माझ्याकडे असल्याचे सांगितले होते. तर महाजनांनी तीन महिने मुंबईच्या हॉटेलात लोढाचे पाय चेपले होते. खडसेंनी केलेल्या या दाव्यांनी राजकीय वर्तुळात आणखी खळबळ उडवून दिली आहे. महाजनांनी जो फोटो ट्विट केला, बोलका फोटो नाही, बोलका फोटो ट्विट करा जे मी केलं असही खडसे म्हणाले.

खडसे म्हणाले, मी जोपर्यंत मंत्रीमंडळात होतो तोपर्यंत गिरीश महाजनांना मंत्रीमंडळात स्थान नव्हतं. त्यामुळे ते षडयंत्र करत आहेत. मी ४० वर्ष पक्ष वाढवला पण गिरीश महाजन यांच्यामुळे मला पक्ष सोडावा लागला. हे सगळ्या महाराष्ट्राला माहिती आहे. 'मी तुमच्यासारखं मुख्यमंत्र्यांच्या मागे फिरत नाही कुठेही लोटांगण घालत नाही. देवा भाऊचे पाय मी चाटत नाही असा हल्लाबोल खडसेंनी महाजन यांच्यावर केला.