BJP Election News : नाशिक मतदारसंघातून खासदार गोडसे उमेदवारीसाठी निश्चित?

Nashik BJP-Shinde Group Politics : भाजपचे प्रदेशाध्यक्ष चंद्रशेखर बावनकुळे यांनी भाजपचे खासदार असलेल्या दिंडोरीपेक्षा नाशिक मतदारसंघाच्या तयारीसाठी दौरा केला. पदाधिकारीही जोमाने कामाला लागले आहेत. मात्र, आजच्या घडीला भाजपची आघाडी असल्याने ही सर्व तयारी विद्यमान खासदार हेमंत गोडसे यांच्यासाठीच सुरू असल्याचे चित्र आहे. (BJP is busy with strong prepration for Loksabha election)

नाशिक (Nashik) लोकसभा मतदारसंघाबरोबरच भाजपने (BJP) विधानसभा निवडणुकीची तयारीदेखील सुरू केली आहे. या मतदारसंघात विद्यमान खासदार हेमंत गोडसे (Hemant Godse) हे एकनाथ शिंदे (Eknath Shinde) गटाचे आहेत. त्यामुळे या सर्व तयारीचा लाभ उमेदवार म्हणून गोडसे यांना मिळेल का?

भारतीय जनता पक्षाचे प्रदेशाध्यक्ष चंद्रशेखर बावनकुळे यांनी नुकताच नाशिकचा दौरा केला. या दौऱ्यात त्यांचा सर्व भर लोकसभा निवडणुकीच्या तयारीवर होता. त्यांनी दोन टप्प्यात सर्व सहा विधानसभा मतदारसंघांतील सहाशे बूथप्रमुखांचा मेळावा घेऊन निवडणूक तयारीचा संदेश दिला.

आगामी लोकसभेला महाराष्ट्रातील ४८ पैकी ४५ जागा जिंकण्याचे भाजपचे लक्ष्य आहे. त्यासाठी त्यांनी विरोधी पक्षांचे खासदार असलेले मतदारसंघ आपल्या रडारवर घेतले आहेत. लोकसभेबरोबरच विधानसभेचीही जोरदार तयारी सुरू केली असून, त्याचाच एक भाग म्हणून निवडणूक प्रचार प्रमुख गिरीश पालवे यांसह विधानसभा मतदारसंघांचे प्रमुखदेखील नियुक्त केले.

नाशिक लोकसभा मतदारसंघातील नाशिक पश्चिम- राजेश दराडे, नाशिक मध्य- अनिल भालेराव, नाशिक पूर्व- सुनील केदार, सिन्नर- जयंत आव्हाड, देवळाली- तनुजा घोलप आणि इगतपुरी- सीमा झोले यांचा समावेश आहे. पुढच्या टप्प्यात हे प्रमुख कार्यकर्त्यांच्या प्रशिक्षणावर भर देणार आहे. त्यामुळे भाजपने सुरू केलेल्या या जोरदार तयारीचा लाभ विद्यमान खासदार हेमंत गोडसे यांना मिळणार की, भाजपचे प्रबळ दावेदार दिनकर पाटील यांसह इतर उमेदवारांना मिळणार याची उत्सुकता आहे.