Thackeray on Gulabrao Patil : ठाकरेंचा गुलाबराव पाटलांना इशारा; म्हणाले, सभेत घुसणार म्हणणाऱ्या घुशींना...

Jalgaon News : माजी मुख्यमंत्री उद्धव ठाकरे (Uddhav Thackeray) यांची जळगावमध्ये आज (दि.२३ एप्रिल) जाहीर सभा पार पडली. यावेळी त्यांनी गुलाबराव पाटलांवर जोरदार हल्लाबोल केला. ''सभेत घुसणार? म्हणणाऱ्या घुशींना बिळातून बाहेर काढून आपटणार'', असं म्हणत उद्धव ठाकरेंनी गुलाबराव पाटलांना इशारा दिला आहे.

उद्धव ठाकरे म्हणाले, ''या सभेला जमलेली गर्दी पाहिल्यानंतर हे कळतं की शिवसेना कुणाची आहे. पाकिस्तान सुद्धा सांगेल की शिवसेना कुणाची आहे. पण आपल्याकडे मोतीबिंदू झालेल्या निवडणूक आयोगाला हे कळत नाही. मात्र, तो त्यांचा दोष आहे. त्यानंतर काही जणांना वाटलं की ते म्हणजेच शिवसेना. मग काय म्हणाले की आम्ही सभेत घुसणार?, आम्ही अशा घुसा खूप पाहिल्या आहेत. घुशींना बिळातून बाहेर काढून आपटणार'', असं म्हणत ठाकरेंनी गुलाबराव पाटलांना टोला लगावला.

''40 गद्दार गेले तरी काही फरक पडत नाही. पण एक निष्ठावंत गेल्यावर फरक पडतो. आजही आर ओ तात्यांची उणीव भासवते. निवडून दिलेले गद्दार झाले आहेत. मात्र, निवडून देणारे आजही माझ्याबरोबर आहेत. त्यामुळे या गद्दारांना जसं आपण घोड्यावर बसवलं, तसंच खाली खेचण्याची वेळ आली आहे'', असं म्हणत ठाकरेंनी शिंदे गटावर जोरदार टीका केली.

''आता हे उलट्या पायाचं सरकार आलं आहे. उलट्या पायाचं सरकार राज्यात आल्यापासून अवकाळी पाऊस सुरू आहे. अवकाळीने नुकसान झालेल्यांना भरपाई देखील अद्याप मिळाली नाही. माझ्याकडे शेतकऱ्यांनी टोहो फोडला. आता जर त्यांना व्यासपीठावर आणलं तर त्यांनाही हे सरकार अटक करतील. सरकार विरोधात बोलणाऱ्यांना लगेच अटक करण्यात येते. खरं तर खरं बोललं तर अटक करण्यात येते'', असं म्हणत भाजपवर टीका केली.

दरम्यान, भाषणाच्या शेवटीही उद्धव ठाकरे यांनी गुलाबराव पाटील यांना इशारा दिला. ते म्हणाले, ''मी वाट बघत होतो, घुसणारे कधी घुसणार आहेत, पण ते घुसले नाहीत. संजय राऊत जे बोलले होते, की घुसणारे परत जाणार नाहीत. आम्ही अजूनही शांत आहोत, याचा अर्थ आम्ही नामर्द नाहीत'', असं म्हणत ठाकरेंनी गुलाबराव पाटलांवर जोरदार टीका केली.

(Ediited By Ganesh Thombare)