Tapovan Controversy : गिरीश महाजनांकडून तपोवन वादाचे 'डॅमेज कंट्रोल', नाशिकमध्ये 1 हजार झाडे लावायला सुरुवात

Nashik News : कुंभमेळ्यासाठी नाशिकमध्ये येणाऱ्या साधूमंहतांच्या राहण्याची सोय करण्यासाठी तपोवनात साधूग्राम उभारण्यात येणार आहे. परंतु त्यासाठी १८०० झाडे तोडली जाणार असल्याने त्याविरोधात पर्यावरणप्रेमींचे आंदोलन सुरु आहे. एकही झाड तोडू देणार नाही अशी भूमिका पर्यावरणप्रेमेंनी घेतली आहे. कुंभमेळामंत्री गिरीश महाजन यांच्यावर पर्यावरणप्रेमींनी राग व्यक्त केला आहे. कारण महाजन यांचे या वृक्षतोडीला समर्थन आहे.

तपोवनातील वृक्षतोडीचा वाद दिवसेंदिवस आणखी वाढत चालला आहे. एकीकडे पर्यावरणप्रेमींचे आंदोलन सुरु आहे. दुसरीकडे वृक्षतोडीविरोधात अॅड. पिंगळे यांनी हरित लवादाकडे याचिका दाखल केली होती, त्यावर लवादाने वृक्षतोडीला स्थगिती दिली आहे. तर तिसरीकडे तपोवनातील मंदिरांना आरक्षणासंदर्भात बजावलेल्या नोटिसांच्या पार्श्वभूमीवर तिन्ही आखाडे न्यायालयीन लढाईसह आंदोलनाच्या पवित्र्यात आहेत.

या सगळ्यात कुंभमेळामंत्री गिरीश महाजन यांची मोठी कोंडी झाली आहे. तपोवनातील वादात गिरीश महाजन हे पर्यावरणप्रेमींसह आखाड्यांच्या टार्गेटवर आहेत. पर्यावरणप्रेमेंनी तर यापूर्वी गिरीश महाजनांना लाकुडतोड्या म्हणून संबोधले आहे. अभिनेते सयाजी शिंदे यांनीही वृक्षतोडीवरुन महाजन यांना शिंगावर घेतलं आहे. त्यापार्श्वभूमीवर वृक्षारोपणाचा मुहूर्त साधून एकप्रकारे तपोवन वादाचे डॅमेज कंट्रोल करण्याचा प्रयत्न गिरीश महाजनांकडून केला जात असल्याचे दिसते.

नाशिकमध्ये आज (दि. १५) पासून वृक्ष लागवड मोहीम सुरू करण्यात आली आहे. 'आपले नाशिक-हरित नाशिक' या संकल्पनेवर आधारित 'हरित नाशिक' मोहिमेची सुरुवात करण्यात आली आहे. नाशिकच्या मखमलाबाद परिसरातील कॅनॉल लगतच्या सर्व्हे नंबर ६९ या सुमारे अडीच एकर जागेवर तसेच गोदावरीच्या किनारी सुनियोजित प्रकल्पालगत एकत्रितपणे सुमारे एक हजार देशी प्रजातींच्या झाडांची लागवड करण्यास येत आहे.

या वृक्षलागवडीच्या माध्यमातून कुंभमेळा मंत्री गिरीश महाजन यांच्याकडून तपोवनातील वृक्षतोडीच्या वादावर समेट घडवून आणण्याचे प्रयत्न होत आहेत. आमचे सरकार पर्यावरणविरोधी नाही हे दाखवण्याचा प्रयत्न होताना दिसत आहे. त्यासाठी आजपासून एक हजार वृक्ष लागवडीला सुरुवात करण्यात आली आहे. याशिवाय वृक्षरोपणासह विविध विकासकामांचा शुभारंभ देखील आज होत आहे.