Girish Mahajan : गिरीश महाजनांच्या चेहऱ्यावर आनंद मावेना, १० वर्ष राजकारणापासून दूर राहिलेला तो नेता भाजपात दाखल

Jalgaon Politics : जळगाव जिल्हा हा भाजपचा बालेकिल्ला राहीला असून गिरीश महाजन यांच्या नेतृत्वात पक्षात इनकमिंग जोरात सुरु आहे. आगामी महापालिकेसह जिल्हा परिषद, पंचायत समित्यांच्या निवडणुका डोळ्यासमोर ठेवून पक्ष बळकटीकरणासाठी व विविध विषयांवर चर्चा करण्यासाठी रविवारी शहरात बैठक झाली. या कार्यक्रमात जिल्हातील अनेक पदाधिकाऱ्यांनी भाजपात प्रवेश केला.

जळगाव महापालिकेत दोन टर्ममध्ये यश मिळवलेले माजी नगरसेवक मनोज दयाराम चौधरी यांनी भारतीय जनता पक्षात प्रवेश केला. तब्बल दहा वर्षांनंतर त्यांनी सक्रिय राजकारणात उतरण्याचा निर्णय घेतला व भाजपची वाट धरली. यानिमित्ताने त्यांनी आगामी महापालिका निवडणुकीच्या रिंगणात उतरण्याचे संकेत दिले आहेत.

चौधरी हे सुरवातीला 'एनएसयूआय' व पर्यायाने कॉंग्रेसचे कार्यकर्ते होते. शिवसेनेचे नगरसेवक व त्यानंतर राष्ट्रवादी कॉंग्रेसच्या तिकिटावर त्यांनी जळगाव विधानसभेची निवडणूक लढली होती. परंतु निवडणुकीत पराभव झाल्याने ते राजकारणापासून अलिप्त राहिले. गेल्या १० वर्षांपासून ते राजकारणात सक्रिय नव्हते, आता भाजपात प्रवेश करत त्यांनी राजकारणात सक्रीय होण्याचा निर्णय घेतला.

चौधरी गेली दहा वर्षी राजकारणापासून काहीसे दूर असले तरी त्यांच्या स्वच्छ प्रतिमेमुळे ते जनतेत लोकप्रिय राहिले आहेत. शिवाय स्थानिक पातळीवर पक्षाचे बळ वाढवण्यासाठी निश्चितच त्यांचा उपयोग पक्षाला होणार आहे. त्यांचा जनसंपर्क व अनुभव लक्षात घेता आगामी महापालिका निवडणुकीत ते भाजपचा बालेकिल्ला आणखी अधिक बळकट करण्यासाठी महत्त्वाची भूमिका ते बजावू शकतात. विशेषतः शहराच्या मध्यवर्ती भागात त्यांचा प्रभाव लक्षात घेता, निवडणुकीचे गणित बदलू शकते.

याशिवाय रावेरच्या माजी नराध्यक्ष शीतल पाटील यांनी देखील आपल्या पती व सहकाऱ्यांसह भाजपात प्रवेश केला. इतरही अनेक कार्यकर्त्यांनी या कार्यक्रमात भाजपचा गमछा आपल्या गळ्यात घातला आहे. येत्या काही महिन्यात स्थानिक स्वराज्य संस्थांच्या निवडणुका होत असून पक्षात होत असलेलं हे इनकमिंगमुळे पक्षाला बळकटी देणारं ठरणार आहे. येणाऱ्या काळात आणखी काही प्रवेश होणार असल्याची माहिती मंत्री गिरीश महाजन यांनी दिली आहे.