Chhagan Bhujbal : चुकीचं बोलणाऱ्या नेत्यांकडे लक्ष द्या, छगन भुजबळांचा सल्ला कुणाला?

Chhagan Bhujbal : राज्यातील महायुती सरकारच्या काही मंत्र्याची वादग्रस्त विधानं थांबलेली नाही. वादग्रस्त वक्तव्य केल्याने शिवसेनेचे सामाजिक न्याय मंत्री संजय शिरसाठ, राष्ट्रवादीचे मंत्री माणिकराव कोकाटे चांगलेच चर्चेत आहेत. यामुळे मंत्री कोकाटेंवर तर कारवाई झाली आहे. त्याचे कृषी खाते काढून घेण्यात आले आहे. असे असताना आता बेडरुम व्हिडीओमुळे वादात अडकलेले मंत्री संजय शिरसाठ यांनी आणखी एक वादग्रस्त विधान केलं आहे.

अकोल्यातील एका कार्यक्रमात बोलताना निधी मागा, सरकारचा पैसा आहे, आपल्या बापाचं काय जातंय? असं म्हटल्याने नव्या वादाला तोंड फुटलं आहे. यावरुन विविध राजकीय नेत्यांच्या प्रतिक्रिया येत आहे. यासंदर्भात पत्रकारांनी विचारलं असता अन्न व नागरी पुरवठा मंत्री छगन भुजबळ यांनी आपल्याच महायुती सरकारमधील प्रमुख तीन्ही नेत्यांना सल्ला दिला आहे.

चुकीची कृती आणि चुकीचं बोलणाऱ्या नेत्याकंडे महायुतीच्या प्रमुख नेत्यांनी लक्ष द्यायला हवं असं अन्न व नागरी पुरवठा मंत्री छगन भुजबळ यांनी म्हटलं आहे. भुजबळ म्हणाले, कोणता नेता काय बोलतोय, कोण चुकीचं बोलतंय किंवा काही चुकीची कृती कोणी केली असेल तर या मंत्र्यांच्या प्रमुख नेत्यांनी मग त्यामध्ये भाजपचे मुख्यमंत्री देवेंद्र फडणवीस, शिवसेनेचे उपुख्यमंत्री एकनाथ शिंदे व राष्ट्रवादीचे अजित पवार यांनी ते पाहायला हवं. कोण काय बोलतंय यावर लक्ष ठेवायला हवं असा सल्ला छगन भुजबळ यांनी तिघा प्रमुख नेत्यांना दिला आहे.

दरम्यान पनवेलमध्ये सुरु असलेल्या लेडीज बारमध्ये मनसेने तोडफोड करत मनसेचा 'खळ खट्याक' पद्धतीचा पवित्रा घेतला आहे. त्यावर भुजबळांना विचारले असता भुजबळ म्हणाले, काही चुकीचं घडत असेल तर निदर्शने करणे, शांतता पूर्ण आंदोलन करणं असे अनेक लोकशाहीला अभिप्रेत असलेले मार्ग आहेत. मुख्यमंत्री फडणवीसांनी देखील सांगितलं आहे की, कृपाकरुन कुणीही कायदा हातात घेऊ नये असं भुजबळ म्हणाले.

दरम्यान वाल्मिक कराड यांची बदनामी करणे तुम्हाला महागात पडेल अशी धमकी राष्ट्रवादीचे नेते जिंतेंद्र आव्हाड यांना गोट्या गिते याने दिली आहे. त्यासंदर्भात विचारले असता भुजबळ म्हणाले, जितेंद्र आव्हाड त्यासंदर्भात पोलिस व सायबरला तक्रार देतील व कोण आहे तो शोधून काढतील. त्याच्यावर कारवाई करतील असं भुजबळ म्हणाले.