Drug Case : ड्रग्ज प्रकरणातील आरोपींना फाशीची शिक्षा द्या; बाळासाहेब थोरात आक्रमक

प्रदीप पेंढारे

Nagar News : राज्यातील ड्रग्ज प्रकरणाकडे राज्य सरकार गांभीर्याने पाहत नाही. त्यामुळे राज्यातील तरुण वर्गाचे भवितव्य धोक्यात आले आहे. तरुणपिढीचे भवितव्य उद्‌ध्वस्त करणाऱ्या ड्रग्ज माफियांना फाशीची शिक्षा झाली पाहिजे, अशी मागणी करत काँग्रेसचे विधीमंडळ पक्षनेते बाळासाहेब थोरात यांनी राज्य सरकारवर जोरदार टीकास्त्र सोडले. (Give death sentence to the accused in drug cases: Balasaheb Thorat's demand)

ड्रग्जच्या आहारी गेलेल्या एकट्या व्यक्तीचे नुकसान होत नाही तर संपूर्ण कुटुंबाची घडी विस्कटते. ते स्वतःबरोबरच कुटुंबाचेही नुकसान करत असतात. समाजातील वाईट घटनांना आळा घालण्याची ज्यांची जबाबदारी आहे, ते सरकार मात्र त्यावर काम करताना दिसत नाही. ड्रग्जच्या प्रकरणांकडे जेवढ्या गांभीर्यपूर्वक लक्ष द्यायला हवे, तेवढे लक्ष राज्य सरकार आणि पोलिस प्रशासनाकडून दिले जात नाही. हाच मोठा चिंतेचा विषय आहे, अशी चिंताही आमदार बाळासाहेब थोरात यांनी व्यक्त केली.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

थोरात म्हणाले की, मुळात तरुणपिढी या व्यसनांकडे कशी वळते, हे तपासण्याची गरज आहे. ड्रग्ज प्रकरणातील आरोपी का पकडण्यात आले नाहीत. या विषयावर सर्वांनी गंभीरपणे काम करण्याची गरज आहे. कारण, हा महाराष्ट्राच्या भविष्याचा प्रश्न आहे. आतापर्यंतच्या प्रकरणांत दोष कोणाचा आहे. कोण चुकले आहे, याची चौकशी करून ड्रग्ज माफियांना फाशीची शिक्षा झाली पाहिजे. तसेच, या ड्रग्ज माफियांना मदत करणाऱ्यांनाही शिक्षा झाली पाहिजे.

ड्रग्ज माफिया ललित पाटील याचे एका मंत्र्यांबरेाबर छायाचित्र प्रसिद्ध झाली आहेत. त्यावर बोलताना थोरात यांनी ‘अशा गंभीर प्रकरणात लगेच कोणाला दोषी समजून त्यांच्या कारवाईचा बडगा उगारणे योग्य नाही. राज्यात कोणाच्या जिवावर एवढे मोठे ड्रग्ज रॅकेट चालवले जात आहे, हेही पुढे आले पाहिजे, अशी अपेक्षा थोरातांनी व्यक्त केली.

महाराष्ट्राचे भविष्य असलेल्या तरुणाईला व्यसनाच्या विळख्यात कोण अडकवत आहे, याचा तपास लागला पाहिजे. ड्रग्ज प्रकरणात पाठबळ देणाऱ्यांना चिरडून टाकले पाहिजे. अशा प्रकरणात कोणाचाही मुलाहिजा ठेवण्यात येऊ नये, असेही थोरातांनी म्हटले आहे.