Igatpuri Nagar Parishad Result: भाजपला मोठा धक्का! 30 वर्ष एकहाती सत्ता असलेल्या नगराध्यक्षाचा पराभव; शिंदेंच्या उमेदवाराने चारली धूळ

उत्तर महाराष्ट्रातून मोठी बातमी समोर येत आहे. इगतपुरी (जि.नाशिक) नगरपरिषदेचा धक्कादायक निकाल लागला आहे. 30 वर्ष एकहाती सत्ता असलेल्या नगराध्यक्षाचा पराभव झाला असून येथे शिंदे सेनेच्या उमेदवाराने बाजी मारली आहे.

गेल्या तीस वर्षापासून इगतपुरी नगरपरिषदेवर एकहाती सत्ता ठेवणारे माजी नगराध्यक्ष संजय इंदुलकर यांचा शिवसेना शिंदे गटाचे मंगेश शिरोळे यांनी पराभव केला आहे.

नाशिक जिल्ह्यात एकूण 11 नगरपरिषदांसाठी मतमोजणी सुरु आहे. यातील 6 नगरपरिषदांकडे सर्वांचे लक्ष लागले आहे. इगतपुरी नगर परिषद हा ठाकरे गटाचा गड म्हणून ओळखला जातो.

इगतपुरीमध्ये सर्वच प्रमुख उमेदवारांनी भाजपामध्ये प्रवेश केल्याने ठाकरेंसाठी हा मोठा धक्का होता. यासोबतच अजित पवार आणि शिंदे गट ही इथे भाजप विरोधात मैदानात होता.

निवडणुकीपूर्वी शिवसेना उद्धव बाळासाहेब ठाकरे पक्षाचे माजी नगराध्यक्ष संजय इंदुलकर आणि उपनगराध्यक्ष नईम खान यांनी आपल्या समर्थकांसह भाजपात प्रदेशाध्यक्ष रवींद्र चव्हाण यांच्या उपस्थितीत प्रवेश केला होता.

नगराध्यक्ष आणि उपनगराध्यक्ष ठाकरेंची साथ सोडल्यामुळेभाजपला मोठी ताकद मिळाली आहे. शिंदेंच्या शिवसेनेच्या शालिनी खताळे या विजयी झाल्या आहेत. भाजपला हा मोठा धक्का मानला जात आहे.

प्रचारादरम्यान उपमुख्यमंत्री शिंदे यांची येथे सभा झाली होती. महाबळेश्वरनंतर इगतपुरीला थंड हवेचे ठिकाण म्हणून मान्यता देऊन पर्यटनाचा दर्जा देऊन प्रचंड रोजगार उपलब्ध करून देऊ, असे आश्वासन दिले तसेच आडवण येथे महिंद्रा कंपनीचा प्लँट आणत बेरोजगारी दूर करू असेही शिंदे म्हणाले होते.

इगतपुरी नगरपरिषदेवर शिवसेनेची (उबाठा) एकहाती सत्ता होती. मात्र शहराचा विकास करण्यासाठी निधी उपलब्ध होत नव्हता. त्यामुळे भाजपत (BJP) प्रवेश केला, असे संजय इंदुलकर यांनी पत्रकार परिषदेत सांगितले होते.