Nashik BJP News : संकटमोचक गिरीश महाजन नाशिकमध्ये असतानाच भाजपच्या नेत्यावर 'संकट', गोळीबार प्रकरणात पोलिसांकडून अटक

Nashik News : नाशिकच्या पंचवटी परिसरात काही दिवसांपूर्वी सागर जाधव या व्यक्तीवर गोळीबार करण्यात आला होता. या प्रकरणी तपास करत नाशिक पोलिसांनी आता मोठी कारवाई केली असून भाजपचे माजी नगरसेवक जगदीश पाटील यांना अटक केली आहे. विशेष म्हणजे संकटमोचक मंत्री गिरीश महाजन हे नाशिकमध्ये असतानाच जगदीश पाटील यांना अटक झाल्याने राजकीय वर्तुळात खळबळ उडाली आहे.

पंचवटीतील फुलेनगर परिसरात बुधवारी (दि. १७) मध्यरात्री बारा वाजता घराच्या ओट्यावर बसलेल्या सागर विठ्ठल जाधव या युवकावर गोळीबार करण्यात आला होता. सागरला दोन गोळ्या लागल्याने तो गंभीर जखमी आहे. त्याच्यावर सध्या खासगी रुग्णालयात उपचार सुरू आहेत.

पोलिसांच्या प्राथमिक तपासात या हल्ल्यामागे पूर्ववैमनस्य आणि टोळीयुद्ध असल्याचे उघड झाले आहे. पोलिसांनी या प्रकरणात अकरा संशयित आरोपींना ताब्यात घेतलं आहे. तर दोन आरोपी अजूनही फरार असून, त्यांचा शोध पोलिसांकडून घेतला जात आहे.

दरम्यान आज या प्रकरणात पोलिसांनी मोठी कारवाई केली आहे. भाजपचे माजी नगरसेवक जगदीश पाटील यांना पोलिसांनी अटक केली आहे. पाटील यांची वैद्यकीत तपासणी केली जाणार असून त्यासाठी त्यांना जिल्हा रुग्णालयात दाखल करण्यात आलं आहे. यामुळे नाशिकमध्ये एकच खळबळ उडाली आहे.

आगामी स्थानिक स्वराज्य संस्थांच्या निवडणुका जवळ आल्या असताना नाशिकमध्ये भाजपसमोरील अडचणी वाढत आहेत. कारण काही दिवसांपूर्वीच भाजपचे नगरसेवक उद्धव निमसे यांनाही राहुल धोत्रे खून प्रकरणात अटक करण्यात आली होती. ते सध्या कोठडीत आहेत. आता सलग दुसऱ्यांदा पंचवटीत झालेल्या गोळीबार प्रकरणात भाजपचे माजी नगरसेवक जगदीश पाटील यांच्यावर झालेल्या पोलीस कारवाईमुळे भाजप पक्षाची प्रतिमा ढागळल्याची चर्चा सुरु आहे.

विशेष म्हणजे जलसंपदा मंत्री गिरीश महाजन आज नाशिक दौऱ्यावर असतानाच भाजपचे माजी नगरसेवक जगदीश पाटील यांना पोलिसांनी बेड्या ठोकल्या आहेत. भाजपच्या दुसऱ्या माजी नगरसेवकावर झालेली ही कारवाई नाशिकच्या राजकीय वर्तुळात चर्चेचा विषय बनली आहे.