Jalgaon Politics : जळगावला शेतकरी मोर्चात जोरदार राडा; आंदोलक गेट तोडून कलेक्टर ऑफिसमध्ये शिरले

Jalgaon News : केळी उत्पादकांच्या प्रश्नावर जळगावला गुरुवारी (18 सप्टेंबर) निघालेल्या सर्वपक्षीय मोर्चाला अचानक आक्रमक वळण मिळाले. जिल्हाधिकाऱ्यांनी मोर्चास्थळी येण्यासाठी नकार दिल्याने शेतकरी आक्रमक झाले होते. मोर्चात राडा करीत शेतकऱ्यांनी जिल्हाधिकारी कार्यालयाचे गेट तोडून आत प्रवेश केला.

शिवसेना उद्धव बाळासाहेब ठाकरे पक्षाचे नेते आणि माजी खासदार उन्मेष पाटील यांनी या मोर्चाचे आयोजन केले होते. यामध्ये प्रहार संघटनेचे माजी आमदार बच्चू कडू यांसह राष्ट्रवादी काँग्रेस शरदचंद्र पवार पक्ष आणि काँग्रेस देखील सहभागी झाली होती. या मोर्चाला केळी उत्पादक शेतकऱ्यांचा मोठा प्रतिसाद मिळाला.

मुख्यमंत्री देवेंद्र फडणवीस यांनी कर्जमाफीचे आश्वासन तातडीने पाळावे. तसेच केळी उत्पादक शेतकऱ्यांना अर्थसहाय्य करावे, अशा मोर्चातील प्रमुख मागण्या होत्या. मोर्चा जिल्हाधिकारी कार्यालयाच्या गेटवर आल्यानंतर पाटील यांनी जिल्हाधिकारी आयुष प्रसाद यांनी निवेदन घेण्यास मोर्चास्थळी यावे अशी मागणी केली. त्याला जिल्हाधिकाऱ्यांनी ठाम नकार दिला.

जिल्हाधिकाऱ्यांच्या नकारामुळे शेतकरी संतप्त होत घोषणा देऊ लागले. आक्रमक झालेल्या पाटील आणि बच्चू कडू यांनीही जिल्हाधिकारी आयुष प्रसाद यांनी प्रवेशद्वारावर यावे असा हट्ट धरला. त्यामुळे पोलीस आणि शेतकऱ्यांमध्ये बाचाबाची झाली. पोलिसांनी गेट बंद केल्याने शेतकऱ्यांनी गेटला धक्के देत जिल्हाधिकारी कार्यालयात प्रवेश केला. जय जवान जय किसान यासह विविध घोषणांनी जिल्हाधिकारी कार्यालयाचे आभार दुमदुमले.

पोलिसांनी अडकाठी आणूनही नेते आणि शेतकरी जिल्हाधिकारी आयुष प्रसाद यांच्या दालनात अक्षरशः घुसले. त्यानंतर निवेदन देऊन ते बाहेर पडले. यानंतर बोलताना पाटील म्हणाले, जळगावमध्ये सर्व 11 आमदार, दोन खासदार आणि 3 मंत्री सत्ताधारी पक्षाचे आहेत. केळी उत्पादक संकटात असताना यातील कोणीही मदतीला आला नाही. जिल्हाधिकारी यांनी शेतकऱ्यांची गाऱ्हाणी ऐकू नये असे सत्ताधाऱ्यांना वाटते. त्याचा आम्ही निषेध करतो.