- भूषण श्रीखंडे, जळगाव
Jalgaon Politics : जळगाव महानगरपालिकेत महायुतीने विजयाचा गुलाल उधळला असून उमेदवारांची बिनविरोध निवड होण्याची मालिका सुरूच आहे. आतापर्यंत महायुतीचे तब्बल १२ उमेदवार बिनविरोध निवडून आले आहेत.
गेल्या तीन दिवसांत जळगाव महापालिकेच्या विविध प्रभागांमधून झालेल्या माघारीनंतर भाजप- शिवसेना- राष्ट्रवादी कॉंग्रेस महायुतीचे १२ उमेदवार बिनविरोध झाले आहेत. यात शिवसेनेचे ६, भाजपचे ६ उमेदवारांचा समावेश आहे.
भाजपच्या बिनविरोध उमेदवारांमध्ये उज्ज्वला बेंडाळे, विशाल भोळे, दीपमाला काळे, अंकिता पाटील, डॉ. विश्वनाथ खडके, वैशाली पाटील यांचा तर शिवसेनेकडून गौरव सोनवणे, मनोज चौधरी, रेखा चुडामण पाटील, प्रतिभा देशमुख, सागर सोनवणे, विक्रम सोनवणे यांचा समावेश आहे. या यशानंतर महापालिकेबाहेर भाजप आणि शिवसेना पदाधिकाऱ्यांनी जोरदार जल्लोष केला.
दोन आमदार पुत्र बिनविरोध
शिवसेना आमदार चंद्रकांत सोनवणे यांचे सुपत्र गौरव सोनवणे व भाजप आमदार राजू मामा भोळे यांचे सुपुत्र विशाल भोळे हे बिनविरोध झाले आहेत. त्यामुळे आमदार सोनवणे व भोळे यांना मोठा दिलासा मिळाला आहे. विशाल भोळे हे पहिल्यांदाच महापालिकाच्या माध्यमातून निवडणुकीत उभे राहिले आणि बिनविरोध निवड झाली आहे. त्यांच्या निवडीनंतर कार्यकर्त्यांमध्ये आनंदाची लाट आहे.
आधी भाजपने उघडलं खातं
सुरुवातीला भाजपने खाते उघडले होते. भाजपच्या माजी महापौर उज्वला बेंडाळे यांच्या विरोधात दाखल असलेला अर्ज फेटाळण्यात आल्याने त्या बिनविरोध विजयी झाल्या होत्या. त्यापाठोपाठ मग दुसरे खाते शिवसेनेने उघडले होते. शिवसेना आमदार चंद्रकांत सोनवणे यांचे सुपुत्र डॉ. गौरव सोनवणे यांची बिनविरोध निवड झाली.
महापालिका निवडणुकीचा अर्ज मागे घेण्यासाठी आजचा शेवटचा अवधी शिल्लक राहिला असताना राजकीय नेत्यांची धाकधूक चांगलीच वाढली होती. तर दुसरीकडे बंडखोरांचे बंड शमवण्यासाठी पक्षश्रेष्ठींकडून शर्थीचे प्रयत्न झाले. दरम्यान, या सर्व घडामोडींमध्ये जळगाव महानगरपालिकेत महायुतीने तब्बल 12 नगरसेवक बिनविरोध निवडून आणले आहेत. एकप्रकारे विजयाचा शंखनादच फुंकला आहे.
शिवसेनेच्या महानगर प्रमुखाचीच माघार
जळगाव महापालिकेतील वॉर्ड क्रमांक २ ड मधून शिवसेनेच महानगर प्रमुख संतोष पाटील यांनी आपला उमेदवारी अर्ज माघारी घेतला आहे. यामुळे राजकीय वर्तुळात चर्चेला उधान आले आहे. उमेदवारी अर्ज भरताना संतोष पाटील यांनी शिवसेना आणि अपक्ष असे दोन अर्ज दाखल केले होते. मात्र त्यांना एबी फॉर्म मिळू शकला नाही. त्यानंतर पक्षाकडून माघार घेण्यास सांगण्यात आल्याने आपण उमेदवारी मागे घेतल्याचे त्यांनी सांगितले
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.