BJP Ramesh Karad controversial statement : फडणवीसाच्या शिलेदारांचं विधान, रोहित पवारांनी हेरलं; म्हणाले, 'तमाम जनतेचा अपमान...'

Maharashtra politics news : भाजप महायुती सरकारमधील नेते, मंत्री यांच्यातील वादग्रस्त विधानाची स्पर्धा थांबायला काही तयार नाही. या स्पर्धेतील वादग्रस्त विधानं, राष्ट्रवादी काँग्रेस पार्टी शरदचंद्र पवार पक्षाचे आमदार रोहित पवार हे मात्र चांगलेच हेरतात.

भाजप नेते मुख्यमंत्री देवेंद्र फडणवीस यांच्यासमोरच लातूरमधील भाजप आमदार रमेश कराड यांनी त्यांच्या मतदारसंघाची पाकिस्तानशी केलेल्या तुलनेचे विधान आमदार रोहित पवार यांनी हेरलं आहे.

मुख्यमंत्री देवेंद्र फडणवीस (Devendra Fadnavis) काल लातूर इथं दौऱ्यावर होते. विविध कार्यक्रमांना त्यांनी हजेरी लावली. दिवंगत लोकनेते गोपीनाथ मुंडे यांच्या पूर्णाकृती पुतळ्याचं देखील त्यांच्या हस्ते अनावरण झाले. लातूरमधील भाजप आमदार रमेश कराड यांनी त्यांच्या मतदारसंघाची तुलना पाकिस्तानशी केली. या वादग्रस्त विधानाचा व्हिडिओ आमदार रोहित पवार यांनी ट्विट केला आहे.

लातूर (Latur) ग्रामीण मतदार संघाचे भाजपचे आमदार रमेश कराड यांनी आपल्या मतदारसंघाबाबत भाषणादरम्यान केलेले वक्तव्य सध्या राजकीय आणि सामाजिक वर्तुळात वादाचा विषय ठरत आहे. बेताल बरळणाऱ्या सत्ताधाऱ्यांमध्ये लातूर ग्रामीणचे आमदार रमेश कराड यांचाही समावेश झाला.

'‘‘लातूर ग्रामीण मतदारसंघ म्हणजे पाकिस्तानात भारताचा झेंडा लावण्यासारखा प्रकार’’, हे त्यांचं वक्तव्य म्हणजे लातूर ग्रामीण मतदारसंघातील तमाम जनतेचा अवमान आहे आणि याबाबत त्यांनी माफी मागितली पाहिजे', अशी मागणी आमदार रोहित पवार यांनी केली आहे.

'आमदार रमेश कराड यांनी हे वादग्रस्त वक्तव्य करताना विशेष म्हणजे, मुख्यमंत्री देवेंद्र फडणवीस हे व्यासपीठावर असूनही त्यांनी कराड यांना रोखलं नाही, त्यामुळं त्यांचाही या वक्तव्याला पाठिंबा आहे का? असा प्रश्न पडतो', असे रोहित पवार यांनी म्हटलं आहे.

आमदार रमेश कराड यांनी केलेल्या या वादग्रस्त विधानाने अनेकांच्या भावना दुखावल्या गेल्यात, तर विरोधकांकडून देखील आमदार कराड यांच्या या वक्तव्यावर टीकेची झोड उठवली आहे. दरम्यान बेताल बरळणाऱ्या सत्ताधाऱ्यांमध्ये आता लातूर ग्रामीणचे आमदार रमेश कराड यांचाही समावेश झाला आहे.