Eknath Khadse Politics : नाथाभाऊंना आयती संधी मिळाली; भाजपच्या मंत्र्यांना टाकले धर्मसंकटात

Khadse vs Mahajan News : जळगाव जिल्ह्यातील नगरपालिका निवडणुका एकतर्फी होण्याचा दावा भाजपने केला आहे. मात्र आता भाजपच्या नेत्यांवरच विरोधकांनी प्रश्नचिन्ह निर्माण केले आहे. त्यामुळे जळगावचे राजकारण तापले आहे. माजी मंत्री एकनाथ खडसे आणि जलसंपदा मंत्री गिरीश महाजन यांच्यातील राजकीय वैर सर्वश्रुत आहे. या राजकारणाला पुन्हा एकदा नगरपालिका निवडणुकीत फोडणी मिळाली आहे.

खडसे यांनी भाजपच्या नेत्यांची खरडपट्टी काढली आहे. जलसंपदा मंत्री महाजन सातत्याने एकनाथ खडसे यांच्या विरोधात आरोप करीत असतात. त्यांचे हे आरोप अगदी वैयक्तिक आणि पक्षीय स्तरावर देखील असतात. त्यामुळे खडसे आणि महाजन यांच्यात कोणत्या विषयावरून वाद निर्माण होईल, याचा नेम नसतो.

नगरपालिका निवडणुकीचा प्रचार धुमधडाक्यात सुरू आहे. भाजप नेते या निवडणुका जिंकण्यासाठी सर्व थराला जाण्याची तयारी ठेवून आहेत. त्यामुळे भाजपच्या नेत्यांवर विरोधकांकडून विविध आरोप होत आहेत. आता मात्र भाजपच्या घराणेशाहीवरून नव्या वादाला सुरुवात झाली आहे. माजी मंत्री खडसे यांनी भाजपच्या नेत्यांना चांगलेच फैलावर घेतले आहे. निवडणूक प्रचारात तो मुद्दा अचानक पुढे आला.

भुसावळ येथे प्रचारात माजी मंत्री खडसे यांनी घराणेशाहीच्या प्रश्नावर भाजपच्या नेत्यांना घेरले. ते म्हणाले, मंत्री महाजन सातत्याने माझ्यावर घराणेशाहीचा आरोप करतात. खडसे यांना सर्व पदे घरातच हवी असतात असे ते म्हणतात. जामनेर नगरपालिका निवडणुकीत नगराध्यक्ष पदाच्या उमेदवार साधना महाजन कोण आहेत? गिरीश महाजन राज्याचे मंत्री आहेत. त्यांच्या पत्नी नगरपालिका निवडणुकीत नगराध्यक्ष पदाच्या उमेदवार आहेत. मग कार्यकर्ते आहेत कुठे? कार्यकर्त्यांना काय दिले?, असे सवाल खडसेंनी केले.

भाजपच्या बहुतांशी नेत्यांची अशीच अवस्था असल्याचे खडसे म्हणाले. संजय सावकारे राज्याचे मंत्री आहेत. त्यांच्या पत्नी नगराध्यक्षपदाच्या उमेदवार आहेत. आमदार किशोर पाटील, मंगेश चव्हाण यांसह विविध नेत्यांनी हाच कित्ता गिरवला आहे. इतरांवर खोटे नाटे आरोप करून तोंड सुख घेणारे हे नेते आहेत. त्यांचा पक्ष भाजप देखील वेगळा नाही. त्यामुळे माझ्यावर आरोप करताना, 'तेव्हा कुठे गेला होता तुझा धर्म' असे म्हणण्याची वेळ आली आहे, अशी टीका खडसेंनी केली.

नगरपालिका निवडणुकीच्या निमित्ताने खडसे यांनी त्यांच्यावर भाजप नेत्यांनी केलेल्या आरोपांची परतफेड केली आहे. त्यामुळे जळगावच्या राजकारणात पुन्हा एकदा खडसे विरुद्ध भाजपचे सर्व नेते अशी स्थिती आहे. त्यांच्यात राजकारण चांगलेच तापण्याची चिन्हे आहेत.