Mahayuti News: 'शिंदेंमुळेच भाजपला जीवनदान' म्हणणाऱ्या शिवसेना आमदारावर भाजपचा पलटवार; काढली 'राजकीय कुंडली'

सागर निकवाडे

Nandurbar News: नंदुरबारच्या राजकारणात महायुतीतील अंतर्गत मतभेद पुन्हा एकदा उघड झाले आहेत. भाजपला मुख्यमंत्री एकनाथ शिंदे यांच्यामुळे ‘जीवनदान’ मिळाले, अशी टिप्पणी शिवसेनेचे आमदार चंद्रकांत रघुवंशी यांनी नुकतीच केली होती. त्यांच्या या वक्तव्यावर भाजपचे नंदुरबार जिल्हाध्यक्ष नीलेश माळी यांनी जोरदार पलटवार केला आहे. रघुवंशी यांच्या राजकीय भूमिकांवर प्रश्न उपस्थित करत माळी यांनी त्यांच्यावर संधीसाधूपणाचा आरोप केला.

भाजपच्या राजकीय वाटचालीबाबत रघुवंशी यांनी केलेले भाष्य योग्य नसल्याचे माळी यांनी म्हटले आहे. एखाद्या नेत्याने आपल्या राजकीय भूमिकांचा विचार न करता दुसऱ्या पक्षावर टिप्पणी करणे योग्य नाही, असा टोला त्यांनी लगावला. रघुवंशी यांची विधाने अत्यंत बालिश असल्याची टीकाही त्यांनी केली.

रघुवंशी यांच्या राजकीय प्रवासाचा संदर्भ देत माळी यांनी रघुवंशी यांच्यावर थेट शब्दांत टीका केली. राजकीय परिस्थितीनुसार भूमिका बदलण्याची प्रवृत्ती हा रघुवंशी यांचा स्थायीभाव असल्याचे ते म्हणाले. आधी काँग्रेस, त्यानंतर ठाकरे गट आणि आता शिंदे गट असा त्यांच्या राजकीय प्रवासाचा उल्लेख करत भाजप जिल्हाध्यक्षांनी रघुवंशी यांच्या वक्तव्याला प्रत्युत्तर दिले.

नंदुरबारमध्ये महायुतीतील घटक पक्षांमध्ये स्थानिक पातळीवर अनेकदा मतभेद समोर येत असल्याचे चित्र आहे. त्यातच आता भाजप आणि शिंदे गटातील दोन प्रमुख नेत्यांच्या वक्तव्यांमुळे राजकीय वातावरण पुन्हा तापले आहे. रघुवंशी यांनी भाजपच्या संदर्भात केलेल्या विधानावर माळी यांनी केलेला पलटवार त्यामुळे चर्चेचा विषय ठरला आहे.

माळी यांच्या या टीकेमुळे नंदुरबारमधील महायुतीतील अंतर्गत राजकीय संघर्ष पुन्हा चर्चेत आला आहे. रघुवंशी यांच्या वक्तव्याला भाजपकडून थेट उत्तर मिळाल्याने आगामी काळात या वादाला आणखी कोणते वळण मिळते, याकडे राजकीय वर्तुळाचे लक्ष लागले आहे.