Nashik BJP : भाजपच्या 'त्या' दोन माजी नगरसेवकांची यंदाची दिवाळी 'कोठडीतच', न्यायालयाने जामीन अर्ज फेटाळला

Nashik BJP : नाशिकमध्ये महानगरपालिका निवडणुक तोंडावर असताना सत्ताधारी भाजपचे दोन माजी नगरसेवक मात्र पोलिस कोठडीत आहे. खून व गोळीबाराच्या गुन्ह्यात अटक झालेल्या पंचवटीतील या दोन्ही माजी नगरसेवकांची तुर्तास तरी सुटका होईल अशी चिन्हे नाहीत. त्यामुळे दोघांची यंदाची दिवाळी कोठडीतच साजरी होण्याची शक्यता आहे.

आगामी महापालिका निवडणुकीसाठी भाजपने शंभर प्लसचा नारा दिला आहे. त्यादृष्टीने स्वबळावर निवडणुक लढवण्यासाठी भाजपची तयारी सुरु आहे. परंतु असे असतानाच शहरातील गंभीर गुन्ह्यात भाजपचे नेते, पदाधिकारी यांचा सहभाग आढळून येत आहे. त्यावरुन विरोधकांनी भाजपला घेरण्याचा प्रयत्न केला असता दुसरीकडे मुख्यमंत्री देवेंद्र फडणवीस यांनी कुणालाही राजाश्रय दिला जाणार नाही असे सांगत पोलिस आयुक्तांना कारवाईसाठी फ्री हॅण्ड दिल्याने या माजी नगरसेवकांची आणखीच गोची झाली आहे.

त्यातच आता राहुल धोत्रे या युवकाच्या खून प्रकरणात मुख्य सूत्रधार व भारतीय जनता पक्षाचा माजी नगरसेवक उद्धव निमसे याचा जामीन अर्ज जिल्हा व सत्र न्यायालयाने फेटाळून लावला आहे. तसेच पंचवटीतील राहुलवाडी येथे सागर जाधव या युवकावर झालेल्या गोळीबार प्रकरणात अटकेत असलेले भाजपचे दुसरे माजी नगसेवक जगदीश पाटील हेही पोलिस कोठडीत आहे. त्यामुळे भाजपच्या दोन्ही माजी नगरसेवकांची यंदाची दिवाळी कोठडीतच साजरी होण्याची शक्यता आहे.

नाशिकच्या नांदूर नाका परिसरात २२ ऑगस्टला राहुल धोत्रे व अजय कुसाळकर यांच्यावर निमसे टोळीने हल्ला केला. यात राहुल धोत्रे याचा उपचारादरम्यान मृत्यू झाला. तर अजय कुसाळकर हा जखमी आहे. या हल्ल्यानंतर भाजपचे माजी नगरसेवक उद्धव निमसे फरार होते. त्यानंतर काही दिवसांनी ते स्वत:हून पोलिसांना शरण आले. पोलिसांनी त्यांना अटक केली. निमसे सध्या नाशिक रोड मध्यवर्ती कारागृहात न्यायालयीन कोठडीत असून त्यांनी नाशिक जिल्हा व सत्र न्यायालयात जामिनासाठी अर्ज केला होता.

या प्रकरणात भाजपचे माजी नगरसेवक उद्धव निमसे यास अटक करण्यात आली होती. सध्या नाशिक रोड मध्यवर्ती कारागृहात न्यायालयीन कोठडीत असलेल्या निमसे याने नाशिक जिल्हा व सत्र न्यायालयात जामिनासाठी अर्ज केला होता.

त्यावर गुरुवारी (दि. १६) न्या. दळवी यांच्यासमोर सुनावणी झाली. या वेळी सरकार पक्षातर्फे निमसे याच्या जामिनाला तीव्र विरोध करण्यात आला. त्यानंतर न्या. जे. एम. दळवी यांनी निमसे याचा जामीन अर्ज फेटाळून लावला आहे. त्यामुळे निमसेंची तुरुंगवारी वाढली आहे. तसेच सातपूर गोळीबार खंडणी प्रकरणात आरपीआय नेते व माजी नगरसेवक प्रकाश लोंढे देखील कोठडीतच आहे. त्यांची देखील दिवाळी कोठडीतच जाण्याची शक्यता आहे.