Devendra Fadnavis Politics : फडणवीस शब्द विसरले, मंत्रीपदाचा शब्द दिलेल्या आमदाराला केलं थोडक्यात खूश..

Nashik Politics : आगामी महापालिका, जिल्हा परिषद व पंचायत समिती, तसेच नगरपालिका निवडणुकीत सत्ता मिळवण्यासाठी भाजपने तयारी सुरु केली आहे. त्याचाच भाग म्हणून पक्षाच्या वतीने निवडणुकीच्या जबाबदारीचे वाटप करण्यात आले आहे. भाजपने नाशिक जिल्ह्यातील ग्रामीण भागाचे नाशिक उत्तर व नाशिक दक्षिण असे दोन भाग केले आहेत. चांदवडचे आमदार डॉ. राहुल आहेर यांच्याकडे जिल्हा परिषद निवडणुकीसाठी उत्तर विभागाची जबाबदारी सोपविण्यात आली आहे.

मात्र राहुल आहे यांच्याकडे नाशिक उत्तर विभागाची जबाबदारी देत पक्षाने त्यांना थोडक्यात खूश केल्याची चर्चा सध्या राजकीय वर्तुळात रंगली आहे. त्याला कारणही तसेच आहे. विधानसभा निवडणुकीच्या प्रचारादरम्यान स्वत: भाजप नेते देवेंद्र फडणवीस यांनी चांदवड मतदार संघात प्रचार सभा घेतली होती. पक्षाचे उमेदवार राहुल आहेर यांच्यासाठीच ती सभा झाली होती.

या सभेत देवेंद्र फडणवीस यांनी चांदवड मतदारसंघातील उपस्थितांना जाहीरपणे आश्वासन दिलं होतं. तुम्ही मला आमदार द्या मी तुम्हाला मंत्री देतो असं फडणवीस म्हणाले होते. वीस हजाराच्या आत मताधिक्य असल्यास राज्यमंत्री तर वीस हजाराहून अधिक मताधिक्य असल्यास राहुल आहेर यांना कॅबिनेट मंत्री करेल असं आश्वासन फडणवीसांनी दिलं होतं.

त्यानुसार राहुल आहेर यांना चांदवड मतदारसंघातून लोकांनी मोठ्या मताधिक्यांनी विजयी केलं. आहेर यांनी हॅट्रिक केली. आहेर यांना एक लाख चार हजार मते मिळाली व ते अठ्ठेचाळीस हजार ९६१ मताधिक्याने विजयी झाले. मात्र त्यानंतर महायुती सरकारमधील मंत्रीमंडळाचे वाटप करताना फडणवीस यांची मोठी अडचण झाली. ते राहुल आहेर यांना दिलेला शब्द पहिल्या टर्ममध्ये पूर्ण करु शकलेले नाही.

राहुल आहेर हे फडणवीस यांच्या अपेक्षा पेक्षा अधिक मतांनी निवडून आले. त्यानंतर फडणवीस दिलेला शब्द पाळतील या आशेत चांदवड मतदारसंघातील जनता होती. मतदार संघात तर त्यावरुन पैंजा लागल्या होत्या. पण त्यानंतर त्यांची निराशा झाली. त्यामुळे मंत्री पदाचा शब्द न पूर्ण करता आल्याने फडणवीस यांनी स्थानिक स्वराज्य संस्थांच्या निवडणुकीच्या पार्श्वभूमीवर जबाबदारी देत आहेर यांना थोडक्यात खूश केल्याचे बोलले जात आहे.