Nashik Kumbh Mela : नाशिक-त्र्यंबकेश्वर येथे होणारा आगामी सिंहस्थ कुंभमेळा अवघ्या दीड वर्षांवर येऊन ठेपला आहे. त्यादृष्टीने जिल्हा प्रशासनाकडून कुंभमेळ्याच्या तयारीला वेग आला असून मंत्री गिरीश महाजन यांच्या अध्यक्षतेखाली बैठकांवर बैठकांचे सत्र सुरु झाले आहे.
रविवारी नाशिक व त्र्यंबकेश्वर कुंभमेळा प्राधिकरणातर्फे मंत्री महाजन यांच्या अध्यक्षतेखाली पंचवटीतील पंडित विष्णू दिगंबर पलुस्कर सभागृहात 'कुंभ-मंथन' बैठक झाली. यावेळी बैठकीत बोलताना, 'प्रयागराज येथील कुंभमेळ्याच्या तुलनेत नाशिक व त्र्यंबकेश्वरचा सिंहस्थ कुंभमेळा आव्हानात्मक आहे". असं महाजन यांनी म्हटलं आहे.
महाजन पुढे म्हणाले, नाशिक-त्र्यंबकेश्वर कुंभमेळ्यासाठी आपल्याकडे जागेची उपलब्धता फारच कमी आहे. ऑगस्ट २०२७ मध्ये ऐन पावसाळ्यात भाविकांसह साधू-महंतांना सर्व सुविधा उपलब्ध करून दिल्या जातील. सर्वांच्या सहकार्यातूनच हा कुंभमेळा यशस्वी होईल, असा विश्वास देखील कुंभमेळामंत्री तथा समितीप्रमुख गिरीश महाजन यांनी यावेळी व्यक्त केला.
कुंभमेळ्याच्या कामांसाठी मुख्यमंत्री देवेंद्र फडणवीस यांनी निधी कमी पडू देणार नाही, अशी ग्वाही दिली असल्याचे महाजन यांनी सांगितले. आगामी कुंभमेळा हा नाशिकच्या भविष्यावर दूरगामी परिणाम करणारा महोत्सव आहे. यामुळे रस्ते, पुलांची कामे होणार आहेत. रस्ते तयार करताना ती दीर्घकाळ टिकतील, असे नियोजन करण्यात येईल. टिकाऊ कामांवर भर राहील. दुचाकी प्रवासी वाहतुकीचा विचार केला जाईल. कुंभमेळ्यासाठी अत्याधुनिक तंत्रज्ञानाचा वापर केला जाईल असं महाजनांनी सांगितलं.
दरम्यान आगामी कुंभमेळ्याच्या दृष्टीने जनतेमधून काही सूचना आहेत. त्यामध्ये मुख्यत:पंतप्रधान नरेंद्र मोदी यांच्या हस्ते सिंहस्थ कुंभमेळा लोगोचे अनावरण केले जावे अशी एक सूचना करण्यात आली आहे. याशिवाय सिंहस्थापूर्वी आडगाव ट्रक टर्मिनलचा प्रश्न मार्गी लावावा, नाशिक विमानतळाचे विस्तारीकरण, रेल्वेस्थानकावर फलाट वाढविणे, 'समृद्धी'ला कनेक्ट करणारे रोड निर्माण करणे, धार्मिक पर्यटनाला चालना देण्यासाठी 'त्र्यंबकेश्वर-नाशिक- सप्तश्रृंगगड' असा विचार व्हावा, कला, सांस्कृतिक संघटनांचा सहभाग हवा, सातपूर, अंबडमध्ये गटार योजना व्हावी अशा सूचना जनतेतून आल्या आहेत.
दरम्यान सिंहस्थ कुंभमेळ्याच्या प्रभावशाली नियोजन व अमंलबजावणीसाठी मुख्यमंत्री देवेंद्र फडणवीस यांच्या अध्यक्षतेखाली शिखर समिती स्थापन करण्यात आली आहे. यात राज्याचे अनेक मंत्री, प्रशासनातील उच्चस्तरीय अधिकारी, खासदार, आमदारांसह पुरोहित संघाचा समावेश करण्यात आला. त्यावर शिखर समितीत 'पुरोहित' चालतात मग साधु-महंत का नको, असा प्रश्न महंतांनी उपस्थित केला. शिखर समितीत साधु-महंतांचा समावेश नसल्याने दोन्ही ठिकाणच्या आखाडाप्रमुख, ठाणापतींमध्ये तीव्र नाराजी पसरली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.