Dada Bhuse Politics : नाशिकमध्ये अजितदादांचा पक्ष महायुतीतून होणार आउट, दादा भुसेंच्या डोक्यात काय चाललंय?

Nashik Politics : नाशिकमध्ये महापालिका निवडणुकीसाठी शिवसेना शिंदे गट व भाजपमध्ये खलबते सुरु आहे. शिवसेनेचे दादा भुसे यांनी फोनद्वारे गिरीश महाजन यांच्यासोबत संपर्क करुन चर्चा केली असून, दोन दिवसांत मंत्री महाजन हे नाशिकमध्ये येणार आहेत. तेव्हा प्रत्यक्षभेटून चर्चा करणार असल्याची माहिती शिवसेनेचे शालेय शिक्षणमंत्री दादाभुसेंनी माध्यमांशी बोलताना दिली. पण त्याचवेळी महायुतीतून राष्ट्रवादी कॉंग्रेसला बाजुला ठेवण्याचे संकेत भुसे यांच्या वक्तव्यातून मिळाले आहे.

शिवसेनेला सन्मानजनक जागा मिळाव्या अशी अपेक्षा दादा भुसेंची आहे. राष्ट्रवादी अजित पवार गटाला सोबत घेण्यासंदर्भात अजून चर्चा झाली नसल्याचे भुसे यांनी यावेळी सांगितले. राष्ट्रवादीबाबतचा निर्णय वरिष्ठ पातळीवर होणार असल्याचे भुसे म्हणाले. त्यामुळे आता महापालिकेच्या निवडणुकीत नाशिकमध्ये तरी अजित पवार यांचा राष्ट्रवादी पक्ष महायुतीमधून आउट होण्याचे संकेत मिळाले आहे.

भाजपने नाशिकमध्ये फार आधीच शंभर प्लसचा नारा दिला आहे. त्यामुळे साहजिकच स्थानिक पातळीवर भाजप सुरुवातीपासून स्वबळाच्या तयारीत आहे. सर्व प्रभागांमध्ये भाजपकडून उमेदवाराची चाचपणी व मुलाखती सुरु आहे. पण वरिष्ठ पातळीवर अनेकदा युती म्हणूनच निवडणूक लढवली जाईल असे पक्षश्रेष्ठींकडून सांगण्यात आले असल्याने महायुतीमधील सर्वच घटक पक्षांचे लक्ष युतीसंदर्भातील निर्णयाकडे लागले आहे.

भाजप-शिवसेनेची पहिल्यापासून नैसर्गिक युती राहिलेली आहे. त्यामुळे पक्षादेशानुसार आधी भाजपशी युतीबाबत चर्चा होईल, असे मंत्री दादा भुसेंनी स्पष्ट केले. हिंदुत्वाच्या मुद्द्यावरच या दोन्ही पक्षांचे आजपर्यंतचे राजकारण आहे. त्यावरच निवडणुकाही लढवण्यात आल्या आहेत. त्याच मुद्द्यावर नाशिक मनपाचीही निवडणूक लढावी अशी इच्छा पक्षाचे स्थानिक नेते अन् कार्यकर्ते, इच्छुक उमेदवारांचीही आहे. त्यामुळे राष्ट्रवादीला बाजुला ठेऊन हे दोन्ही पक्ष लढण्याची शक्यता वर्तविली जात आहे.

दरम्यान छगन भुजबळ आजारी असल्याने नाशिकमध्ये राष्ट्रवादीची धुरा समीर भुजबळांकडे शीफ्ट झाली आहे. भुजबळ फार्मवर समीर यांच्याकडून इच्छुकांच्या मुलाखती घेतल्या जात आहेत. त्यामुळे आता युतीबाबत भाजप काय भूमिका घेते. काय निर्णय होईल? याकडे घटक पक्षांचे लक्ष्य लागून आहे.