Nashik BJP : नाराज कार्यकर्त्यांनी दिलेल्या गाजराचा भाजप शहराध्यक्षांनी हलवा करुन खाल्ला.. त्यानंतर काय म्हणाले पहा..

Nashik Politics : नाशिक महापालिका निवडणुकीसाठी तिकीट वाटप करण्यात आल्यानंतर आयारामांना उमेदवारी दिली आणि निष्ठावंतांना डावलल्याची खंत व्यक्त करत कार्यकर्त्यांचा असंतोष उफाळून आला होता. संतप्त भाजपच्या निष्ठावंतांनी शहराध्यक्ष सुनिल केदार यांना गाजर भेट देत निषेध नोंदवला होता. गाजरीय जनता पार्टी अशा घोषणाही दिल्या होत्या.

नाशिकरोड येथील भाजपच्या कार्यालयाबाहेर निष्ठावंत कार्यकर्त्यांनी घोषणाबाजी करून शहराध्यक्षांना घेराव घालत उमेदवारी का दिली नाही? असा जाब विचारला होता. यानंतर भाजप कार्यालयाला कुलूप लावण्यात आले होते. निष्ठावंत कार्यकर्त्यांनी भाजपने उमेदवारीचे गाजर दाखवले म्हणून शहराध्यक्ष सुनील केदार यांना तेथून निघताना गाजर भेट देत आपला संताप व्यक्त केला होता. अध्यक्ष सुनील केदार यांना मोठ्या रोषाला सामोरे जावे लागले होते. पोलीस बंदोबस्तात सुनील केदार यांना आपली सुटका करुन घेण्याची वेळ आली होती.

आता त्याच सुनिल केदार यांचा एक गमतीशीर व्हिडीओ सोशल मीडियावर व्हायरला झाला असून सर्वत्र त्यांच्या मिश्किल वक्तव्याची चर्चा रंगली आहे. त्याचे झाले असे की, गुरुवारी दि.( ८) नाशिक महापालिका निवडणुकीसाठी भाजपकडून शहराचा विकास आराखडा सादर करण्यात आला. कुंभमेळ्याचे निमित्त साधून 'वचननामा' ऐवजी 'अमृतवचननामा' असे नामकरण करत भाजपने आपला निवडणूक जाहीरनामा मांडला. या प्रकाशन सोहळ्यात शहराध्यक्ष सुनील केदार यांनी केलेले वक्तव्य सध्या चर्चेचा विषय ठरले आहे.

या सोहळ्यात पत्रकारांनी शहराध्यक्षांना पत्रकारांनी प्रश्न केला. तुम्हाला कार्यकर्त्यांनी गाजर दिलं होतं त्यांच्यावर तुम्ही कारवाई केली का? या प्रश्नावर शहराध्यक्षांनी अत्यंत हजरजबाबी उत्तर दिलं. ते म्हणाले, 'त्या गाजराचा आम्ही हलावा करुन खाल्ला आणि प्रचाराला लागलो'

गाजर दाखवणारा भाजपचा निष्ठावान नाही...

दरम्यान त्यानंतर आज शुक्रवार (दि. ९) शहराध्यक्ष सुनिल केदार यांनी त्यांच्या वक्तव्याचा खुलासा केला आहे. त्यांनी म्हटले आहे की, भारतीय जनता पक्षाच्या नाशिक रोड मंडलातील काही कार्यकर्ते, पदाधिकारी भाजपची उमेदवारी मिळाली नाही म्हणून नाराज झाले होते. ते सर्व नाशिक रोडच्या भाजप कार्यालयात एकत्र आले आहेत व त्यांचे म्हणणे ऐकुन घ्यायला येथील मंडल अध्यक्ष शांताराम घंटे यांनी मला बोलावले होते. त्या ठिकाणी ४ प्रभागातील नाराज कार्यकर्ते व पदाधिकाऱ्यांची उपस्थिती होती. भाजपच्या एका माजी नगरसेविकेच्या मुलाने त्या ठिकाणी घोषणाबाजी केली व आक्रस्ताळेपणा केला. मी एकेका प्रभागाच्या कार्यकर्ते व पदाधिकाऱ्यांचे म्हणणे ऐकुन घेत होतो. ते करतांना गोंगाटात ऐकू येत नव्हते म्हणुन आम्ही कार्यालयाचे शटर बंद करत होतो. वास्तविक मला कोंडले वैगेरे काहीही झाले नव्हते. परंतु सर्वांचे म्हणणे ऐकुन घेतल्यानंतर मला गाजर भेट देण्याचा प्रयत्न झाला.

त्यात ज्या माजी नगरसेविकेच्या मुलाने मागील विधानसभा निवडणुकीत नाशिक पुर्व विधानसभा निवडणुकीत राष्ट्रवादी काँग्रेसच्या शरद पवार गटाच्या उमेदवाराचा ४ वेळा पैसे घेऊन प्रचार केला होता. मग हे निष्ठावान कसे हा चिंतनाचा विषय आहे. हे जर स्वतःला निष्ठावान म्हणत असतील तर वेळोवेळी यांनी पक्ष विरोधी भुमिका का घेतल्या. पक्षाने अनेक वेळा संघटनेतील पदे दिली, नगरसेवक केले तरी हे जर नेहमी भाजपच्या विरोधात काम करत असतील तर त्यांना निष्ठावान कसे म्हणायचे. निवडणुक काळात संयम ठेवावा लागतो. याचा अर्थ असा नाही की ज्यांना उमेदवारी दिली नाही त्यांनी पक्षावर बेछूट आरोप करावे. त्यामुळे ज्यांनी मला गाजर देण्याचा प्रयत्न केला त्या गाजराचा हलवा करून खाल्ला व आम्ही पुढील प्रचाराला लागलो असे मी म्हटले होते.

भाजप नेहमी सकारात्मक विचाराने पुढे जाणारा पक्ष आहे. त्यामुळे निष्ठावान कोण व पक्ष विरोधी कारवाया करणारे कोण याचा सर्व लेखा जोखा पक्षाकडे असुन त्यानुसार भाजप योग्य ती खबरदारी घेऊन वाटचाल करत असल्याचे भाजप नाशिक महानगर जिल्हा अध्यक्ष सुनील केदार यांनी म्हटले आहे.