Arvind Sawant Politics: नाशिकला मालकही नाही अन् पालकही नाही, जामनेरहून आयात भाजपच्या कारभाऱ्याने लावली वाट!

BJP Vs Shivsena News: महापालिका निवडणुकीवरून शिवसेना उद्धव ठाकरे पक्ष चांगलाच आक्रमक झाला आहे. भाजप गुन्हेगारांच्या माध्यमातून महापालिका ताब्यात घेण्याच्या प्रयत्नात आहे. हा प्रयत्न उद्धव ठाकरेंची शिवसेना यशस्वी होऊ देणार नाही, असा आरोप त्यांनी केला आहे.

शिवसेना नेते खासदार अरविंद सावंत यांनी नाशिक महापालिका निवडणुकीचा आढावा घेतला. शहरात भाजपने गेली पाच वर्ष विकासाच्या नावाखाली दुरावस्था केली. गुन्हेगारांना पोचण्याचे काम सत्ताधारी भाजपने केले, असा आरोप सावंत यांनी केला.

आगामी काळात शहरातील महिला आणि नागरिकांच्या सुरक्षेसाठी कठोर पावले टाकावे लागतील. त्यासाठी शहर हित डोळ्यापुढे ठेवून मतदारांनी विचार करावा. भाजपला चुकूनही मतदान झाले तर शहर असुरक्षित होईल, असा इशारा त्यांनी दिला.

महापालिका निवडणुकीत भाजपचा एबी फॉर्म वाटपाचा गोंधळ चर्चेत आहे. याबाबत भाजपच्या निष्ठावंतांनी ही गंभीर आरोप केले आहेत. जलसंपदा मंत्री गिरीश महाजन तसेच मुख्यमंत्र्यांकडे थेट तक्रारी करण्यात आल्या आहेत.

यावरून शिवसेना ठाकरे पक्षानेही भाजपवर आरोपाचा बॉम्ब टाकला. महापालिका निवडणुकीत भाजपचे उमेदवार ठरवण्याचे काम कंत्राटदारांनी केले. भाजपच्या एबी फॉर्म चे वाटप कंत्राटदारांच्या घरून झाले, असा गंभीर आरोप अरविंद सावंत यांनी केला.

भाजपने नुकताच शहरात गुंडांचा मेळावा घेतल्याचा आरोप करण्यात आला. नाशिक शहराची संस्कृती बिघडविण्याचा ठेका भाजपने काही लोकांना दिला आहे. निवडणुकीत कोणत्याही परिस्थितीत सत्तेत येण्याचा चंग या पक्षाने बांधला आहे.

आगामी काही दिवसात नाशिक शहरात मोठ्या प्रमाणावर निवडणुकीतील गैरप्रकार करण्याचा भाजपचा प्रयत्न आहे. नागरिकांनी त्याबाबत स्वतः जागरूक रहावे. कोणत्याही चुकीच्या गोष्टीला किंवा आमिषाला बळी न पडता भाजपला धडा शिकवावा. अन्यथा आगामी कालावधीत नाशिक शहरात गुन्हेगारीचा कब्जा पुन्हा वाढेल, असा इशारा देण्यात आला.