Dada Bhuse Politics: शिवसेना, भाजप युतीचे भिजत घोंगडे, एकनाथ शिंदेंच्या शिवसेनेचे इच्छुक झाले अस्वस्थ?, घरवापसीची चर्चा?

BJP Shivsena Alliance News: महापालिका निवडणुकीची प्रक्रिया सुरू झाली आहे. भाजपने निम्म्याहून अधिक इच्छुकांच्या मुलाखती पूर्ण केल्या आहेत. आता महायुती होणार काय? याकडे लक्ष लागले आहे.

शिवसेना एकनाथ शिंदे पक्षाचे नेते नाशिक महापालिका निवडणुकीत महायुती होणार की नाही याकडे डोळे लावून बसले आहेत. यासंदर्भात शिक्षण मंत्री दादा भुसे यांनी सन्मानजनक तोडगा निघावा अशी अपेक्षा व्यक्त केली आहे.

राज्यातील महापालिका निवडणुकांमध्ये महायुती व्हावी असे संकेत मुख्यमंत्री देवेंद्र फडणवीस यांनी दिले आहे. जलसंपदा मंत्री गिरीश महाजन यांनी नाशिक महापालिकेत महायुती व्हावी अशी अपेक्षा व्यक्त केली आहे. मात्र याबाबत जागा वाटपाच्या चर्चेला मुहूर्त मिळालेला नाही.

शिवसेना एकनाथ शिंदे पक्षाने महापालिका निवडणुकीसाठी जोरदार फिल्डिंग लावली होती. त्यासाठी शिवसेना उद्धव ठाकरे पक्षाच्या अनेक माजी नगरसेवकांना त्यांनी फोडले. भाजपशी युती होणार या अपेक्षेने या नगरसेवकांचा पक्षप्रवेश झाला होता.

महापालिकेत गेल्या निवडणुकीत शिवसेनेचे 35 नगरसेवक होते. हे सर्व नगरसेवक आपलेच असल्याचा दावा शिवसेना शिंदे पक्षाने केला आहे. याशिवाय 13 माजी नगरसेवकांनी शिंदे पक्षात प्रवेश केला. या पक्षाकडे अन्य 22 इच्छुक आहेत. त्यामुळे एवढ्या जागा भाजप देणार का? हा गंभीर प्रश्न निर्माण झाला आहे.

शिवसेना शिंदे पक्षाला भाजपकडून 65 जागांची अपेक्षा आहे. महापालिकेत एकूण जागा 122 आहेत. भाजपने यापूर्वीच हंड्रेड प्लस चा नारा दिला आहे. अशा परिस्थितीत शिवसेना शिंदे पक्षाचा सन्मान जनक प्रस्ताव भाजपला पचनी पडेल का? ही चर्चा आहे.

भाजपने महायुती होणार असे संकेत यापूर्वीच दिले आहेत. जलसंपदा मंत्री महाजन यांनी त्याबाबत जाहीर विधान केले आहे. तर त्याच वेळेस या संदर्भात कोणतीही चर्चा झाली नसल्याचेही त्यांनी सांगितले. त्यामुळे महायुती होणार की जागा वाटपाचा चर्चेचे चऱ्हाट लांबत जाणार, ही अनिश्चितता आहे.

आता मात्र निवडणूक प्रक्रिया सुरू झाली आहे. असे असताना महायुती बाबत कोणतेही स्पष्ट संकेत मिळत नाहीत. त्यामुळे शिवसेना एकनाथ शिंदे पक्षाचे अनेक इच्छुक अस्वस्थ झाले आहेत. यातील काही इच्छुकांना घरवापसीचे स्वप्न पडू लागले आहे.