Nashik: एकनाथ शिंदेंनी एजंट नेमले? ठाकरेंचे नगसेवक फोडण्यासाठी 5 कोटींचा निधी? नाशिकमध्ये दोन कट्टर शिवसैनिक भिडले

Nashik Operation Tiger: नाशिक महापालिकेत एजंट नेमून शिवसेना पक्ष नगरसेवक फोडत असल्याचा आरोप शिवसेना (उद्धव बाळासाहेब ठाकरे) पक्षाच्या गटनेत्यांनी केला आहे. या आरोपामुळे नाशिकच्या राजकीय वर्तुळात एकच खळबळ उडाली आहे. नाशिक महापालिकेतील ठाकरेंच्या शिवसेनेच्या नगरसेवकांसाठी 'ऑपरेशन टायगर' राबविले जात असल्याची बातमी समोर आल्यानंतर, शिवसेना आणि शिवसेना (उद्धव बाळासाहेब ठाकरे) पक्षाच्या नेत्यांनी परस्परांवर आरोप-प्रत्यारोप केले असून यामुळे महापालिकेतील राजकीय वातावरण कमालीचे तापले आहे.

शिवसेना (उद्धव बाळासाहेब ठाकरे) पक्षाचे गटनेते केशव पोरजे यांनी आरोप केला आहे की, शिवसेना पक्षातील नेत्यांकडून नगरसेवक फोडण्यासाठी खास एजंट नेमले गेले आहेत. या नगरसेवकांना तब्बल पाच कोटी रुपयांच्या विकास निधीचे आमिष दाखवून पक्षात ओढण्याचा प्रयत्न केला जात आहे. मात्र, शिवसेना (उद्धव बाळासाहेब ठाकरे) पक्षाचे सर्व नगरसेवक पूर्णपणे एकनिष्ठ आहेत, असा दावा गटनेते केशव पोरजे यांनी केला आहे.

या गंभीर आरोपांना शिवसेनेचे नेते अजय बोरस्ते यांनी विनाविलंब चोख प्रत्युत्तर दिले आहे. केशव पोरजे यांचा आपल्या स्वतःच्या पक्षाच्या नगरसेवकांवर अजिबात विश्वास राहिलेला नाही, हेच यावरून दिसून येते आणि हे त्या पक्षातील नगरसेवकांमधील परस्पर अविश्वासाचे जिवंत प्रतीक आहे, असा टोला अजय बोरस्ते यांनी यावेळी लगावला.

बोरस्ते पुढे म्हणाले की, उपमुख्यमंत्री एकनाथ शिंदे जो जो शब्द देतात तो नेहमी पाळला जातो. त्यामुळे त्यांच्या शब्दावर पूर्ण विश्वास ठेवूनच आजवर अनेकांचा पक्षात जाहीर प्रवेश झाला आहे. या सातत्याने होणाऱ्या पक्षप्रवेशांमुळे शिवसेना (उद्धव बाळासाहेब ठाकरे) पक्षामध्ये सध्या मोठी चिडचिड सुरू आहे. खासदार संजय राऊत यांनी विधान परिषद निवडणुकीत गोकुळ गीते यांना पाठिंबा दिला होता आणि त्यानुसार उद्धव ठाकरे पक्षाच्या नगरसेवकांनी गीते यांना मतदान केले होते. मात्र आज निवडून आलेले ते गोकुळ गीते कुठे आहेत आणि कोणत्या पक्षात आहेत? असा सूचक प्रश्नही बोरस्ते यांनी उपस्थित केला.

नाशिक महापालिकेतील नगरसेवकांसाठी सध्या कोणतेही 'ऑपरेशन टायगर' सुरू नाही, असे बोरस्ते यांनी स्पष्ट केले. मात्र, ज्या नगरसेवकांना स्वेच्छेने पक्षात प्रवेश करायचा असेल, त्यांचे शिवसेना पक्षात नेहमी स्वागतच होईल, असे ते म्हणाले. या संदर्भात शिवसेना (उद्धव बाळासाहेब ठाकरे) पक्षाचे गटनेते केशव पोरजे यांनी आधी स्वतःचे आत्मपरीक्षण केले पाहिजे, असा सल्लाही त्यांनी दिला. या पत्रकार परिषदेच्या वेळी उपमहापौर विलास शिंदे हे देखील उपस्थित होते.