Manikrao Kokate Arrest : कोकाटेंपर्यंत पोहोचले नाशिकचे पोलिस; अटकेची कारवाई सुरू, मात्र...

Manikrao Kokate Latest News : मंत्रिपद गमावलेल्या माणिकराव कोकाटे यांना कोणत्याही क्षणी अटक होण्याची शक्यता आहे. नाशिकचे पोलिस अटक वॉरंट बजावण्यासाठी मुंबईतील लीलावती रुग्णालयात दाखल झाले आहे. रुग्णालयाबाहेर माध्यमांचा गराडा आहे.

माणिकराव कोकाटे यांना नाशिकच्या न्यायालयाने दोन वर्ष कारावासाची शिक्षा ठोठावली आहे. या शिक्षामुळे कोकाटे यांना मंत्रिपदाचा राजीनामा द्यावा लागला. आता त्यांना अटक करण्यासाठी पोलिस रुग्णालयात दाखल झाले आहेत.

अजित पवार राष्ट्रवादी काँग्रेस (NCP) पक्षाचे आमदार माणिकराव कोकाटे यांना शिक्षा झाली. नाशिकच्या कनिष्ठ स्तर दहाव्या न्यायालयाने त्यांच्या अटकेचा अजामीन पात्र वॉरंट बजावला आहे. त्यामुळे पोलिसांना आमदार कोकाटे यांना अटक करणे भाग आहे.

पोलिस (Police) आयुक्त संदीप कर्णिक यांच्या सूचनेनुसार दहा कर्मचारी आणि तीन अधिकारी,असा 13 जणांचे पोलिस पथक मुंबईला रवाना झाले. गुरुवारी मुंबईला गेलेले हे पथक सकाळी लीलावती रुग्णालयात पोहोचले. यावेळी अधिकाऱ्यांनी वैद्यकीय अधिकाऱ्यांशी अटकेबाबत चर्चा केली.

सध्या आमदार कोकाटे यांच्या छातीत दुखत असल्याची त्यांची तक्रार आहे. त्यांच्यावर तज्ञांकडून उपचार सुरू आहे. त्यांची ॲजीओग्राफी सुरू आहे. त्याच्या अहवालावर आमदार कोकाटे यांची अटक ठरणार आहे.

दरम्यान काँग्रेस नेते हर्षवर्धन सपकाळ तसेच राष्ट्रवादी काँग्रेस शरदचंद्र पवार पक्षाचे नेते आमदार रोहित पवार यांनी कोकाटे यांना वाचविण्याचा सरकारचा प्रयत्न असल्याची टीका केली आहे. काँग्रेस नेते राहुल गांधी आणि काँग्रेसचे आमदार केदार यांच्याबाबत ज्या तत्परतेने निर्णय घेण्यात आला. त्याच्या उलट कोकाटे यांना संरक्षण देण्यासाठी यंत्रणा काम करत आहे, असा आरोप त्यांनी केला आहे.

कनिष्ठ स्तर न्यायालयाने अजामीन पत्र वॉरंट बजावले आहे. त्याची अंमलबजावणी करणे या हाय प्रोफाईल प्रकरणात बंधनकारक आहे. राजकीय आणि विशेषता सत्ताधारी पक्षाशी संबंधित प्रकरणा असल्याने पोलिस सावध भूमिका घेत आहेत.