Nashik Prakash Londhe : लोढेंच्या अडचणीत पक्षही सोबत नाही, मंत्री आठवलेही चार हात लांब ..?

Nashik news : नाशिकच्या सातपूर येथे एका बारमध्ये झालेल्या गोळीबार प्रकरणात आरपीआयचे नेते व केंद्रीय सामाजिक न्याय राज्यमंत्री रामदास आठवले यांचे निकटवर्तीय माजी नगरसेवक प्रकाश लोंढे यांचा पाय आणखी खोलात गेला आहे. अशात या प्रकरणापासून मंत्री आठवले व पक्षाने चार हात लांब राहण्याचीच भूमिका घेतल्याचे दिसत आहे.

या गोळीबार प्रकरणात प्रकाश लोंढेसह त्यांची दोन्ही मुले भूषण आणि दीपक लोंढे या दोघांनाही आरोपी करण्यात आले आहे. प्रकाश लोंढेसह दीपक लोंढे पोलिस कोठडीत असून भूषण हा फरार आहे. दरम्यान लोंढेच्या अडचणी अधिक वाढण्याचे कारण म्हणजे या गोळीबाराव्यतिरिक्त सातपूर येथील अपहरण प्रकरण व अंबड परिसरातील बंगला बेकायदेशीरपणे बळकावल्याप्रकरणी लोंढे यांच्यावर खंडणीचे गुन्हेही दाखल करण्यात आले आहेत.

शिवाय लोंढे यांच्या कार्यालयात पोलिसांनी झडती घेतली असता त्यात भुयार आढळलं. या भुयाराचा वापर गुन्हेगारीसाठी करण्यात आल्याचं समोर आलं आहे. या भुयारात कुऱ्हाड, कांबी, चाकू अशी घातक हत्यारे सापडली आहेत. महागड्या विदेशी मद्याच्या बाटल्याही पोलिसांनी जप्त केल्या आहेत. त्यामुळे लोंढेच्या अडचणीत आणखी भर पडली आहे.

परंतु इतके सगळे घडूनही अद्याप यावर रामदास आठवले यांनी पक्षाच्या वतीने या प्रकरणावर आपली जाहीर भूमिका स्पष्ट केलेली नाही. सूत्रांकडून मिळालेल्या माहितीनुसार या प्रकरणापासून आठवले यांनी चार हात लांब राहण्याची भूमिका घेतल्याचे समजते. त्यामुळे अडचणीत पक्षही सोबत नसल्याने लोंढे यांच्या अडचणीच भर पडण्याची शक्यता आहे.

या प्रकरणात सुरुवातीला लोंढे हे आठवले यांचे निकटवर्तीय मानले जात असल्याने त्यांच्या बचावासाठी आठवले काही हालचाल करतील असे बोलले जात होते. परंतु सूत्रांनी दिलेल्या माहितीनुसार लोंढेवर एकामागोमाग एक गंभीर गुन्हे दाखल होऊ लागल्याने मंत्री आठवलेंनी हात आखडता घेतला. लोंढेंना ज्यावेळी अटक झाली तेव्हा त्यांच्या समर्थकांनी मंत्री आठवलेंशी संपर्क साधण्याचा प्रयत्न केला. यावेळी मंत्री आठवलेंनी भूषण लोंढेविरोधातील जुन्या तक्रारींची कबुली दिली. मात्र, प्रकाश लोंढेंविरोधातील खंडणीसंबंधीच्या गुन्ह्यांवर त्यांनी तोंडावर बोट व कानावर हात ठेवल्याचे समजते. (Nashik News)

काय आहे प्रकरण ?

सातपूरच्या आयटीआय सिग्नलजवळील 'औरा बार'मध्ये काही तरुणांमध्ये झालेला वाद मिटवणाऱ्या 'बाउन्सर्स" ला धक्काबुक्की झाल्यानंतर उद्भवलेल्या राड्यातून ५ ऑक्टोबर रोजी पहाटे २ वाजता हा गोळीबार झाला होता. या घटनेत गोळी लागल्याने एक ग्राहक गंभीर जखमी झाला. यात प्रकाश लोंढे यांचा मुलगा भूषण लोंढे व त्याच्या साथीदारांचा सहभाग असल्याचे उघडकीस आले.