Nashik Thackeray Group : नाशिकच्या ठाकरे गटात स्फोटक घडामोडी, मातोश्रीवर विलास शिंदे यांच्या अनुपस्थितीमुळे नाराजीचं वादळ अधिकच गडद

Nashik Thackeray group : सुधाकर बडगुजर यांची हकालपट्टी केल्यानंतर नाशिकमध्ये ठाकरे गटात मोठ्या घडामोडी पहायला मिळत आहेत. शुक्रवारी नाशिकमधील ठाकरे गटाचे प्रमुख नेते उद्धव ठाकरे यांच्या भेटीसाठी गेले. ठाकरे गटाचे सगळे प्रमुख पदाधिकारी मातोश्रीवर गेले, मात्र विलास शिंदे त्यांच्यासोबत नव्हते. त्यामुळे राजकीय वर्तुळात चर्चेला उधाण आलं आहे.

सुधाकर बडगुजर यांनी आपण स्वत: नाराज आहोतच शिवाय, महानगरप्रमुख विलास शिंदे यांच्यासह पक्षातील दहा ते बारा जण नाराज असल्याचा दावा केला होता. बडगुजर यांनी मुख्यमंत्री देवेंद्र फडणवीस यांची भेटही घेतली होती. त्यानंतर त्यांच्यावर कारवाई करण्यात आली आहे. त्यांना पक्षातून काढून टाकण्यात आलं आहे. त्यांच्या जागी दत्ता गायकवाड यांच्यावर उपनेते पदाची जबाबदारी उद्धव ठाकरेंनी सोपवली आहे.

शुक्रवारी गायकवाड यांच्यासह जिल्हा प्रमुख डी. जी सूर्यवंशी, सुनील बागुल, माजी आमदार वसंत गिते, उप महानगर प्रमुख बाळा दराडे आणि इतर पदाधिकारी मातोश्रीवर उपस्थित होते. मात्र विलास शिंदे या सगळ्या सोबत गेले नाहीत. कौटुंबिक कारणामुळे ते मातोश्रीवर येऊ शकले नाहीत, अशी माहिती समोर आली आहे. मात्र त्यांच्या अनुपस्थितीमुळे राजकीय वर्तुळात उलट-सुलट चर्चा सुरु झाल्या आहेत.

विलास शिंदे यांच्या लेकीच्या लग्नसोहळ्यासाठी खास एकनाथ शिंदे आले होते. यावेळी एकनाथ शिंदे यांनी बोलताना शिंदे आहेत, शेवटी शिंदेकडेच जाणार असं विधान केलं होतं. त्यामुळे शिंदे यांच्या पक्षांतराच्या चर्चा सुरु झाल्या. त्यानंतर बडगुजर यांनीही पत्रकारपरिषदेत शिंदे देखील नाराज असल्याचं सांगितलं होतं.

बडगुजर यांची हकालपट्टी करण्यात आली त्यावेळी त्या बैठकीला विलास शिंदे देखील उपस्थित होते. मात्र, त्यांनी त्यावेळी आपण ठाकरे गट सोडणार नसल्याचे वृत्त फेटाळले नव्हते. त्यानंतर आज विलास शिंदे मातोश्रीवरी उद्धव ठाकरे यांना भेटायला न आल्याने चर्चांना उधाण आले आहे.

विलास शिंदे हे शिवसेनेचे जुने कार्यकर्ते आहेत. शिवसेनेत फूट पडल्यानंतर विलास शिंदे हे उद्धव ठाकरे यांच्यासोबतच राहीले. त्यामुळे उद्धव ठाकरे यांनी त्यांच्यावर महानगरप्रमुख पदाची जबाबदारी दिली. आगामी महापालिका निवडणुकांच्या दृष्टीने महानगरप्रमुखाची भूमिका महत्वाची असते. अशात शिंदे यांनी नाराजीमुळे पक्षाची साथ सोडल्यास त्याचा फटका पक्षाला बसू शकतो. शिंदे यांच्यासोबत काही माजी नगरसेवक देखील पक्षाची साथ सोडू शकतात. परिणामी शिंदे गटाला त्याचा चांगला फायदा होईल.