Nashik ZP : आमदार कांदेंकडून ठेकेदार पुतण्याचा पर्दाफाश, जिल्हा परिषदेची फसवणूक केल्याने देवेंद्र कांदेंवर गुन्हा दाखल

Nashik News : जिल्हा परिषदेचे ठेकेदार नोंदणी प्रमाणपत्र मिळविण्यासाठी खोटी कागदपत्रे सादर करून जिल्हा परिषदेची फसवणूक करण्यात आल्याचा प्रकार उघडकीस आला आहे. आमदार सुहास कांदे यांच्या चौकशीत या प्रकरणाचा पर्दाफाश झाला.

याप्रकरणी नाशिक जिल्हा परिषदेचे कनिष्ठ प्रशासन अधिकारी प्रदीप आहिरे यांनी भद्रकाली पोलीस ठाण्यात फिर्याद दाखल केली आहे. त्यानुसार गुरुकृपा एंटरप्राइजेसचे देवेंद्र कांदे (रा. तामसवाडी, ता. निफाड) यांच्याविरुद्ध भद्रकाली पोलिस ठाण्यात शासनाची फसवणूक केल्याचा गुन्हा दाखल करण्यात आला आहे.

पोलिसांनी दिलेल्या माहितीनुसार, देवेंद्र कांदे यांनी त्यांचे ठेकेदार नोंदणी प्रमाणपत्र बनवण्यासाठी सादर केलेले दाखले व इतर कागदपत्रे व सत्यता पडताळणी पत्र बनावट सादर केले. ठेकेदार नोंदणी प्रमाणपत्र प्राप्त करून घेतल्याचे निष्पन्न झाले आहे.

२०१७ मध्ये गुरुकृपा एंटरप्राइजेस यांनी जिल्हा परिषदेच्या बांधकाम विभागाकडे वर्ग ५ (५० लाखांपर्यंतची) ठेकेदार नोंदणीसाठी अर्ज केला होता. त्यांनी सादर केलेल्या कागदपत्रांवर आधारित प्रमाणपत्र त्यांना देण्यात आले.

यानंतर १७ ऑगस्ट २०२५ रोजी आमदार सुहास कादे यांनी संबंधित ठेकेदाराच्या नोंदणी प्रक्रियेतील कागदपत्रांची मागणी केली होती. त्यानुसार विभागाने त्यांना त्या कागदपत्रांच्या सत्य प्रती उपलब्ध करून दिल्या. त्यानंतर ११ सप्टेंबर २०२५ रोजी आमदार कांदे यांनी जिल्हा परिषदेला पत्र पाठवून गुरुकृपा एंटरप्रायझेस या संस्थेने सादर केलेल्या पिंपळगाव बसवंत कृषी उत्पन्न बाजार समितीतील तीन कामांच्या दाखल्यांची सत्यता पडताळण्याची विनंती केली. जिल्हा परिषदेने या पत्रानुसार बाजार समितीकडे लेखी आणि ई-मेलद्वारे चौकशी केली असता, संबंधित कामे प्रत्यक्षात न झाल्याचे उघड झाले.

बाजार समितीने संबंधित कामांसाठी कोणतेही पूर्णत्वाचे प्रमाणपत्र किंवा पडताळणी पत्र दिलेले नसल्याचेही स्पष्ट करण्यात आले. चौकशीत असे आढळून आले की, संबंधित ठेकेदाराने बनावट कागदपत्रे आणि खोटी प्रमाणपत्रे सादर करून शासकीय नोंदणी मिळवली होती. त्याच नोंदणीच्या आधारे त्याने विविध शासकीय कामे घेतल्याचे निष्पन्न झाले आहे.