Nashik News : नाशिक जिल्ह्याच्या पालकमंत्रीपदाचा तिढा आजूनही सुटलेला नाही. सरकार स्थापन होऊन आठ महिने झाले तरी पालकमंत्रीपदावरुन वाद सुरु आहे. गिरीश महाजन यांना नाशिकचं पालकमंत्री पद दिल्यानंतर शिवसेना (शिंदे) गटाने नाराजी व्यक्त केली होती. दादा भुसेंना डावलण्यात आल्याने शिंदे गट नाराज होता. त्यानंतर मुख्यमंत्री देवेंद्र फडणवीस यांनी नाशिकसोबतच रायगडच्या पालकमंत्रीपदाला स्थगिती दिली होती. त्यानंतर आजूनही पालकमंत्री नियुक्त करण्यात आलेला नाही. त्यामुळे येत्या 15 ऑगस्टला कोण ध्वजारोहण करणार यावरुन प्रश्न उपस्थित झाला होता.
परंतु आता नाशिकमध्ये मंत्री गिरीश महाजन यांच्या हस्ते ध्वजारोहण केले जाणार आहे. तसे परिपत्रक काढण्यात आले आहे. सामान्य प्रशासन विभागाने कोणत्या जिल्ह्यात कोण ध्वजारोहण करणार याची यादी जाहीर केली आहे. त्यानुसार नाशिकमध्ये मंत्री गिरीश महाजन ध्वजारोहण करतील. नाशिकमध्ये राष्ट्रवादी अजित पवार यांच्या पक्षाचे तीन मंत्री आहेत व शिवसेनेचा एक मंत्री आहे. शिवाय जिल्ह्यात सर्वांधिक आमदार असल्याने राष्ट्रवादीने सुरुवातीपासून पालकमंत्रीपदावर दावा ठेवला आहे. परुंतु राष्ट्रवादी- शिवसेना दोन्ही पक्षांना मागे टाकत भाजपच्या गिरीश महाजन यांनाच ध्वजारोहणाचा मान मिळाला आहे.
विशेषत: नाशिकमध्ये आता राष्ट्रवादी कॉंग्रेसचे जेष्ठ नेते छगन भुजबळ हे देखील मंत्री झाले आहेत. राष्ट्रवादीचे तीन मंत्री जिल्ह्यात असल्याने ध्वजारोहणाचा मान छगन भुजबळ यांनाच मिळावा अशी मागणी जिल्ह्यात सुरु होती. याशिवाय १५ ऑगस्टला झेंडा फडकविण्यासाठी शिवसेनेकडूनही मोर्चेबांधणी सुरु होती. कारण शिंदे सेनेचे दादा भुसे यांचाही नाशिकच्या पालकमंत्रीपदावर दावा आहे.
गेल्या काही दिवसांपासून नाशिकधील ध्वजारोहणाचा मान कुणाला मिळणार याची उत्सुकता होती. अखेर गिरीश महाजन यांचे नाव जाहीर झाल्याने भाजप कार्यकर्ते व गिरीश महाजन यांच्या समर्थकांमध्ये आनंदाचे वातावरण आहे. तर दुसरीकडे भुजबळ समर्थक व भुसे समर्थकांमध्ये काहीशी निराशा आहे.
नाशिकमध्ये आगामी सिंहस्थ कुंभमेळा असल्याने नाशिकच्या पालकमंत्रीपदाला विशेष महत्व आहे. त्यामुळे महायुतीतील तीन्ही पक्षांचा पालकमंत्रीपदावर दावा आहे. गिरीश महाजन हे कुंभमेळा मंत्री म्हणून कारभार पाहत आहेत. असे असताना नाशिकचं पालकत्व नक्की कुणाच्या पदरात पडतं हे पाहावे लागणार आहे. परंतु आठ महिन्यांपासून यासंदर्भातील काय तो निर्णय झालेला नाही. अशात गिरीश महाजन यांनाच पुन्हा ध्वजारोहणाचा मान मिळाल्याने पालकमंत्रीपदही भाजप स्वत:कडेच ठेवेल याचे संकेत मिळाले आहेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.