MLA Nilesh Lanke News : निलेश लंकेंची तब्येत खालावली; तीन किलो वजन झाले कमी

MLA Nilesh Lanke News : अहमदनगर जिल्ह्यातील विविध महामार्गाची दुरावस्था झाली आहे. या महामार्गाची दुरुस्ती करण्यात यावी, या मागणीसाठी पारनेर मतदारसंघातील राष्ट्रवादीचे आमदार निलेश लंके हे अहमदनगर जिल्हाधिकारी कार्यालयासमोर उपोषणाला बसले आहेत. त्यांच्या या उपोषणाचा आज तिसरा दिवस आहे.

लंके यांच्या समवेत राष्ट्रवादीचे (NCP) काही कार्यकर्त्येही उपोषणाला बसले आहेत. डॉक्टरांनी आज लंके यांच्यासह उपोषणकर्त्यांची तपासणी केली. लंकेंची तब्येत काहीशी खालावली असून त्यांचं तीन किलो वजन कमी झालं असल्याचं सांगण्यात आलंय. पण काळजी करण्यासारखं काही नाही, असंही डॉक्टर म्हणाले आहेत.

आरणगाव, चिंचोडी पाटीलमध्ये राष्ट्रवादीच्या कार्यकर्त्यांनी 'रस्ता रोको' आंदोलन करत आमदार लंके यांच्या उपोषणाला पाठिंबा दिला. तर जिल्हाभरातील अनेक गावांनी लंकेंच्या मागणीला पाठिंबा दर्शवला आहे.

दरम्यान, अहमदनगर जिल्ह्यातील विविध महामार्गाच्या मागणीबाबत लवकर तोडगा न निघाल्यास राष्ट्रवादीचे कार्यकर्ते आक्रमक होण्याची शक्यता आहे. त्यामुळे प्रशासन आणि सरकार यावर नेमकं काय निर्णय घेतं? हे पाहणं महत्वाचं असणार आहे.

निलेश लंके यांची मागणी नेमकी काय?

अहमदनगर ते पाथर्डी-शेवगाव, अहमदनगर ते कोपरगाव, अहमदनगर ते करमाळा-टेंभुर्णी या रस्त्यांची तातडीने दुरूस्ती करण्यात यावी, अशी मागणी लंके यांनी केलीय. या रस्त्यांच्या दुरुस्तीसाठी प्रशासनाकडे वेळोवेळी मागणी करण्यात आली. मात्र प्रशासनाकडून देण्यात आलेल्या उत्तरावर समाधान झालं नाही. त्यामुळे लंके गेल्या तीन दिवसांपासून उपोषणाला बसले आहेत.

आंदोलनाला विविध पक्षाचा पाठींबा

अहमदनगर (Ahmednagar) जिल्ह्यातील विविध महामार्गाची दुरावस्था झाली आहे. या महामार्गाची दुरुस्ती करण्यात यावी, अशी मागणी करण्यात आली होती. मात्र तरीही याकडे सरकारने लक्ष दिले नाही. त्यामुळे निलेश लंके (Nilesh Lanke) हे जिल्हाधिकारी कार्यालयासमोर उपोषणाला बसले आहेत. तर या उपोषणाला वंचित बहुजन आघाडी, काँग्रेस (Congress), मनसे (MNS), शिवसेना (Shiv Sena) (ठाकरे गट) या पक्षांनी पाठींबा दिला आहे.