Jalgaon News : गुलाबराव पाटलांच्या कार्यकर्त्यांना पोलिसांनी रोखलं; जळगावात राजकारण तापलं!

Jalgaon Politics : जळगावमधील पाचोऱ्यात आज (दि.२३ एप्रिल) माजी मुख्यमंत्री उद्धव ठाकरे (Uddhav Thackeray) यांची जाहीर सभा होत आहे. मात्र, या सभेपूर्वीच शिवसेना (शिंदे गट) आणि ठाकरे गटामध्ये चांगलच राजकारण तापलं आहे.

''संजय राऊतांनी चौकटीत बोलावं अन्यथा सभेत घुसणार'', असा इशारा गुलाबराव पाटलांनी दिला होता. त्यानंतर संजय राऊतांनीही त्यांना चॅलेंज देत सभेत घुसून दाखवा, असं म्हटलं होतं. यानंतर आता शिवसेनेचे (शिंदे गट) शिवसैनिक चांगलेच आक्रमक झालेत.

शेकडो शिवसैनिकांनी गुलाबराव पाटलांचे मुखवटे चेहऱ्यांवर घालत ठाकरेंच्या सभेच्या ठिकाणी निघाले असता पोलिसांनी त्यांना जळगावातील शिरसोली येथे रोखलं. यावेळी कार्यकर्यांनी मोठी घोषणाबाजी केली. त्यामुळे येथे काही वेळ तणावाचे वातावरण पाहायला मिळाले.

दरम्यान, जळगावच्या पाचोऱ्यामध्ये ठाकरेंची जाहीर सभा होत आहे. मात्र, सभेआधी जळगावमधील राजकीय वातावरण तापलं आहे. त्यामुळे उद्धव ठाकरे आणि संजय राऊत हे या सभेत काय बोलणार? याकडे सर्वांचे सक्ष लागले आहे.

(Ediited By Ganesh Thombare)