Kumbh Mela Politics: 130 कोटी कुठे गेले? प्रकाशा कुंभमेळ्यावरून भाजप-शिवसेना नेते आमनेसामने

सागर निकवाडे

Nandurbar News: नंदुरबार जवळील प्रकाशा (Prakasha) येथील सिंहस्थ कुंभमेळ्याच्या 130 कोटी रुपयांच्या निधीवरून महायुतीतच नव्या वादाला तोंड फुटलं आहे. एकीकडे मुख्यमंत्री निधी मंजूर झाल्याचे दावे होत असताना, दुसरीकडे “तीन रुपयेही प्रत्यक्षात आले नाहीत” असा आरोप करत शिंदे गटाचे आमदार चंद्रकांत रघूवंशी (Chandrakant Raghuvanshi) यांनी भाजपवर निशाणा साधला आहे.

“गावकरी सांगतील ती कामं व्हायला हवीत; ठेकेदार सांगतील ती नव्हे,” असा टोला लगावत चंद्रकांत रघूवंशी यांनी विकासकामांच्या नावाखाली ‘ठेकेदारराज’ सुरू असल्याचा गंभीर आरोप केला. कुंभमेळ्याचा निधी हा कोणाच्या मतदारसंघाचा नसून जनतेच्या सुविधांसाठी असल्याचे सांगत त्यांनी अप्रत्यक्षपणे भाजप नेत्यांवर टीकेची झोड उठवली.

दुसरीकडे भाजपच्या माजी खासदार हीना गावित (Heena Gavit) यांनी लगेचच पलटवार करीत “मुख्यमंत्र्यांनी 130 कोटींचा निधी मंजूर केला आहे. काही जण फक्त श्रेयासाठी राजकारण करत आहेत,” असा चिमटा काढला. जिल्हाधिकाऱ्यांना स्पष्ट सूचना दिल्या असून गावकरी सांगतील तीच कामं होणार असल्याचंही त्यांनी स्पष्ट केलं.

दरम्यान, आमदार विजयकुमार गावित (Vijaykumar Gavit) यांनी गावकऱ्यांना विश्वासात घेऊन सिंहस्थ कुंभमेळ्यासाठी विकास आराखडा तयार केला होता. हा आराखडा मुख्यमंत्री देवेंद्र फडणवीस (Devendra Fadnavis) यांच्याकडे सुपूर्त करण्यात आला असून त्यालाच मंजुरी मिळाल्याचा दावा भाजपकडून करण्यात येत आहे.

सिंहस्थ कुंभमेळ्यासारख्या राष्ट्रीय स्तरावरील धार्मिक सोहळ्याच्या तयारीपेक्षा सध्या श्रेयवाद आणि आरोपांच्या राजकारणालाच जास्त उधाण आल्याचं चित्र आहे. विकासकामं प्रत्यक्षात कधी सुरू होणार आणि 130 कोटींचा निधी नेमका कुठे पोहोचला, याकडे आता प्रकाशासह संपूर्ण नंदुरबार जिल्ह्याचं लक्ष लागलं आहे.