Sameer Bhujbal : समीर भुजबळांच्या नेतृत्वाची अग्निपरीक्षा, काकांप्रमाणे पुतण्यालाही येवलेकर स्विकारतील का?

Chhagan Bhujbal : येवला हा राष्ट्रवादीचे नेते अन्न व नागरी पुरवठा मंत्री छगन भुजबळ यांचा मतदारसंघ आहे. येवला नगरपालिका निवडणुकीत मंत्री छगन भुजबळांची प्रतिष्ठा पणाला लागली आहे. उद्या मतमोजणी असून सर्व राज्याचे लक्ष्य येवला नगरपालिका निवडणुकीच्या निकालाकडे लागले आहे.

छगन भुजबळ हे आजारी आहेत. काही दिवसांपूर्वीच त्यांच्यावर ह्रदय शस्रक्रिया करण्यात आली. डॉक्टरांच्या सल्ल्यानुसार ते सध्या विश्रांती घेत आहे. त्यामुळे येवला नगपालिकानिवडणुकीच्या प्रचारात भुजबळांना सहभागी होता आले नाही. त्यांच्या अनुपस्थितीच निवडणूक झाली.

येवला नगपालिका निवडणुकीची सगळी धुरा भुजबळांचे पुतणे माजी खासदार समीर भुजबळ यांनी हाती घेतली होती. येवल्यात समीर भुजबळ तळ ठोकून होते. समीर यांच्यासोबत संपूर्ण कुटुंब निवडणुकीच्या प्रचारात उतरले होते. भुजबळ कुटुंबीयांनी ही निवडणूक प्रतिष्ठेची केली असून उद्या निकालाच्या दिवशी समीर भुजबळांच्या नेतृत्वाचा कस लागणार आहे.

येवला नगर परिषद निवडणुकीच्या निकालास अवघे काही तास राहिल्याने सर्वच उमेदवारांसह त्यांच्या समर्थकांची धाकधूक वाढली आहे. नगराध्यक्षपदासाठी झालेली यंदाची निवडणूक राष्ट्रवादी काँग्रेस विरुद्ध शिवसेना एवढ्यापुरती मर्यादित न राहता भुजबळ विरुद्ध दराडे बंधू अशीच झाली.

येवल्यात समीर भुजबळांनी भाजपला सोबत घेत उपमहाराष्ट्र केसरी म्हणून नावाजलेले राजेंद्र लोणारी यांना नगराध्यक्षपदाची उमेदवारी दिली. तर दुसरीकडे शिवसेना व शरदचंद्र पवार यांच्या राष्ट्रवादीकडून दराडे बंधूंचे पुतणे रुपेश दराडे यांना उमेदवारी देण्यात आली आहे. त्यामुळे येवला नगरपालिका निवडणुकीची नगराध्यक्षपदाची कुस्ती कोण जिंकेल याकडे सर्वाचे लक्ष लागले आहे.

स्वत:छगन भुजबळ आजारी असल्याने येवल्याबरोबरच आता जिल्ह्यातील राष्ट्रवादीची धूरा समीर भुजबळांकडे शीप्ट झाली आहे. समीर भुजबळांना राष्ट्रवादीचे प्रचारप्रमुख केले आहे. येवला, नांदगाव, मनमाड नगपालिकेतही समीर भुजबळांचा कस लागणार आहे.

भविष्यात छगन भुजबळ हे राज्यातील मंत्रिपदाचा व आमदारकीचा राजीनामा देऊन केंद्रात गेल्यास येवल्यातून समीर भुजबळ हे आमदारकीची निवडणूक लढवतील असे राजकीय जाणकारांचे म्हणणे आहे. पण, ज्याप्रकारे येवलेकरांनी छगन भुजबळांना स्विकारलं त्याचप्रमाणे येवलेकर समीर भुजबळांना स्विकारतील का हा मोठा प्रश्न आहे. नगरपालिका निवडणुकीचा निकाल त्याचेच परिक्षण आहे. येवलेकर समीर भुजबळांच्या नेतृत्वाला कितपत स्विकारतात ते पाहावे लागेल.