Satyajeet Tambe News : सत्यजित तांबे संतापले; ‘अजून किती लोकांचे प्राण जाण्याची वाट पाहणार...?’

Nagar News : आळंदीकडे निघालेल्या पालखीमध्ये पाठीमागून कंटेनर घुसून झालेल्या अपघातात चार वारकरी ठार, तर आठ जण गंभीर जखमी झाले. पुणे-नाशिक महामार्गावर संगमनेर तालुक्यात हा अपघात झाला. यावर आमदार सत्यजित तांबे यांनी राष्ट्रीय महामार्ग विभागाला, ‘अजून किती लोकांचे प्राण जाण्याची वाट पाहणार आहात?’ असा प्रश्न केला आहे. (Satyajeet Tambe angry with National Highways Department over the accident of warkari)

आमदार सत्यजित तांबे यांनी आपल्या ‘एक्स’वर (पूर्वीचे ट्विटर) पोस्ट शेअर केली आहे. केंद्रीय वाहतूकमंत्री नितीन गडकरी यांना त्यांनी टॅग केले आहे. ‘वाढती वाहतूक कोंडी आणि बेशिस्त वाहनचालक यांच्या वाढत्या घटना वारंवार समोर येत आहेत. या महामार्गाच्या सेवारस्त्यावरील (सर्व्हिस रोड) खड्डे बुजवण्यासाठी आणि पथदिव्यांसाठी वारंवार आंदोलने करीत आहोत. आता अजून किती लोकांचे प्राण जाण्याची वाट राष्ट्रीय महामार्ग विभाग पाहणार आहे," अशी प्रश्नार्थक करणारी पोस्ट आमदार तांबे यांनी शेअर केली आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

शिर्डीहून संगमनेरमार्गे आळंदीकडे पालखी निघाली होती. या पालखीमध्ये मागून भरधाव आलेला कंटेरनर घुसला. हा अपघात संगमनेर तालुक्यातील घारगावमधील खंदरमाळ येथे झाला. या भीषण अपघातात बाळासाहेब अर्जुन गवळी (रा. मढी. ता. कोपरगाव), पालखीचे चोपदार बबन पाटीलबा थोरे (रा. शिर्डी), भाऊसाहेब नाथा जपे (रा. कनकुरी, ता. राहाता), आणि ताराबाई गंगाधर गमे (रा. कोर्हाळे, ता. राहाता) यांचा मृत्यू झाला.

अपघातात बिजलाबाई शिरोळे, राजेंद्र सरोदे, भाऊसाहेब गायकवाड, ओंकार चव्हाण, निवृत्ती डोंगरे, शरद चापके, अंकुश कराळ आणि मीराबाई ढमाले हे आठ जण जखमी झाले आहेत. अपघातातील दृश्यं हेलावून टाकणारी होती.

किमान पालख्या जाण्या-येण्याच्या वेळी तरी पोलिसांनी या मार्गावर गस्त घालण्याची मागणी या अपघातामुळे पुढे आली आहे. दरम्यान, काॅंग्रेसचे ज्येष्ठ नेते आमदार बाळासाहेब थोरात यांनीदेखील या अपघाताची दखल घेतली आहे.