Nashik News : राज्यातील स्थानिक स्वराज्य संस्थांच्या निवडणुका पुढील चार महिन्यांत घ्या, असा महत्त्वपूर्ण आदेश सर्वोच्च न्यायालयाने दिला आहे. त्यामुळे सर्वच पक्ष त्यादृष्टीने कामाला लागले आहेत. महायुती व महाविकास आघाडीतील घटक पक्षांमध्ये सध्या कुठे युती करुन लढायचं व कुठे स्वतंत्र यावरच घमासान सुरु आहे. स्थानिक पातळीवरील राजकारण पाहाता महाविकास आघाडी व महायुतीमध्येही अनेक ठिकाणी स्वतंत्र निवडणुका लढवण्याचा निर्णय घेतला जावू शकतो.
नाशिक दौऱ्यावर आलेल्या रोहित पवार यांनी काल राष्ट्रवादी कॉंग्रेस शरदचंद्र पवार पक्षाच्या वतीने निवडणुकीसंदर्भातील तयारीचा आढावा घेतला. १० जूनला पक्षाची नूतन कार्यकारणी जाहीर करणार असल्याचे त्यांनी सांगितले. पक्ष संघटनेत होणाऱ्या बदलांसाठी सर्वांनी तयार राहावं अशा सूचना त्यांनी केल्या आहेत. त्यामुळे आता कार्यकारिणीतील बदलाकडे सर्व पदाधिकारी व कार्यकर्त्यांचे डोळे लागून आहेत.
दरम्यान नाशिक जिल्ह्यातील स्थानिकच्या निवडणुका स्वबळावर लढायच्या की स्वतंत्र यासंदर्भात १० जूनला ज्‍येष्ठ नेते शरद पवार पक्षाची भूमिका स्पष्ट करतील अशी माहिती रोहित पवार यांनी दिली. तोपर्यंत स्थानिक स्वराज्य संस्थेच्या निवडणुकीत समविचारी पक्षांशी चर्चा करा. ते सोबत आले तर ठिक आहे, नाही आले तर स्वबळावर लढण्याची तयारी ठेवा. निवडणुकांना पदाधिकारी व कार्यकर्त्यांनी गांभीर्याने घ्या अशा सूचना त्यांनी केल्या.
यावेळी जिल्हा निरीक्षक सुनिल भुसारा, खासदार भास्कर भगरे, प्रदेश प्रवक्ते विलास लवांडे, ग्रामीण जिल्हाध्यक्ष दत्तात्रेय पाटील, शहराध्यक्ष गजानन शेलार, प्रदेश उपाध्यक्ष गोकुळ पिंगळे, माजी आमदार नितीन भोसले आदी उपस्थित होते. यावेळी, संघर्षाच्या काळात पदाधिकारी व कार्यकर्त्यांनी शरद पवार साहेबांना साथ दिल्याचा आनंद असल्याचे पवार म्हणाले.
नाशिक जिल्ह्यात राष्ट्रवादीचे पक्षसंघटन स्थानिक पातळीवर अतिशय मजबूत आहे. परंतु राष्ट्रवादीत फूट पडल्यानंतर तयार झालेल्या दोन गटांमध्ये ही ताकद विभागली गेली आहे. त्यात अजित पवार यांच्या गटातील तब्बल सात आमदार जिल्ह्यात आहेत. तीन कॅबिनेटमंत्री आहेत. जिल्ह्यात राष्ट्रवादी कॉंग्रेस शरदचंद्र पवार गटात मोजकेच पदाधिकारी व कार्यकर्ते राहिले आहेत. असे असताना जिल्ह्यातील स्थानिकच्या निवडणुकांमध्ये कोण बाजी मारतं हे पाहावे लागणार आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.