Amol Khatal : राजकारण शिकवू नका! दिवाळीनंतर डावपेच दाखवून देईन; अमोल खताळांचा थोरात-तांबेंना इशारा

Sangamner Politics : "मला राजकारण कळत नाही, असा काहींचा समज असेल तर त्यांनी तो मनातून काढून टाकावा. मला राजकारण शिकवण्याच्या फंदात कोणीही पडू नका.

राजकारणाचे डावपेच कसे खेळायचे असतात, हे दाखवून देईल. दिवाळीनंतर डावपेच काय आहे हे मी तुम्हाला दाखवून देईल", असा घणाघात एकनाथ शिंदे शिवसेनेचे संगमनेरमधील आमदार अमोल खताळ यांनी मामा-भाचे, अर्थातच काँग्रेस नेते माजी मंत्री बाळासाहेब थोरात आणि पदवीधर आमदार सत्यजित तांबे यांचे नाव न घेता केला.

संगमनेर (Sangamner) शहरातील अकोले नाका परिसरात शिवसेनेच्या शिव वाहतूक सेनेचे उद्घाटन आमदार खताळ यांच्या हस्ते झाले. शहरप्रमुख विनोद सूर्यवंशी, नगरसेविका साक्षी सूर्यवंशी, विभागप्रमुख बाळासाहेब जगदाळे, आरपीआयचे शहरप्रमुख कैलास कासार आदी उपस्थित होते.

शिवसेनेचे (Shivsena) आमदार खताळ म्हणाले, "संगमनेर नगरपालिका निवडणुकीत यश मिळाले म्हणून विरोधकांनी हुरळून जाऊ नये. तुमचे नगरसेवक टक्केवारी वसूल करण्याचे काम करतात; मात्र आमचे कार्यकर्ते नगरसेवक नसले, तरी जनतेचे प्रश्न सोडविण्यासाठी रस्त्यावर उतरून जनसेवक म्हणून काम करत आहे. शहरातील सर्वसामान्य नागरिक, व्यापारी आणि व्यावसायिकांना कोणी धमकावण्याचा प्रयत्न करत असेल, तर ते अजिबात खपवून घेतले जाणार नाही."

तुमच्या नातेवाईकांचे दवाखाने सुरू राहावे, म्हणून तुम्ही नगरपालिकेचे कॉटेज रुग्णालय बंद पाडले आहे. त्यामुळे आपण घुलेवाडी ग्रामीण रुग्णालयामध्ये 100 खाटांचे केवळ महिला व लहान मुलांसाठी स्वतंत्र रुग्णालय सुरू करण्यात येणार आहे. लवकरच आरोग्यमंत्री संगमनेरमध्ये येऊन येथील आरोग्य व्यवस्था सक्षम करण्याच्या दृष्टीने पावले उचलणार आहे, असेही आमदार खताळ यांनी सांगितले.

एकनाथ शिंदे शिवसेना म्हणजे, निवडणुका डोळ्यांसमोर ठेवून काम करणारा आमचा पक्ष नाही. जनतेच्या प्रश्नांसाठी चोवीस तास कार्यरत राहणे, हेच आमचे ध्येय आहे. सामान्य कार्यकर्त्याला जनतेने संधी दिल्यामुळेच आज मी आमदार झालो आहे. शिववाहतूक सेनेच्या स्थापनेच्या निमित्ताने रिक्षाचालकांना संघटीत करून त्यांच्या अडचणी सोडविण्यासाठी प्रयत्न केले जाणार असल्याचेही आमदार खताळ यांनी सांगितले.

गाव तेथे शाखा, घर तेथे शिवसैनिक!

संगमनेर शहरासह तालुक्यातील प्रत्येक गावात आणि शहरातील प्रत्येक उपनगरात ‘गाव तेथे शाखा आणि घर तेथे शिवसैनिक’ हा उपक्रम राबवून शिवसेनेच्या शाखा सुरू करण्याचा निर्धार आमदार अमोल खताळ यांनी व्यक्त केला. आगामी काळात होणाऱ्या निवडणुका लोकशाही मार्गाने लढविल्या जातील. शिवसेनेचा सामान्य कार्यकर्ता देखील निवडणुकीच्या मैदानात उतरेल. बिनविरोध निवडणुकांच्या राजकारणावरून विरोधकांना लक्ष्य करताना, यापुढे संगमनेर तालुक्यात कोणाचीही दादागिरी खपवून घेतली जाणार नाही, असाही इशारा आमदार खताळ यांनी दिला.